Header Ads

Recent Post
recent

Bomb Hmanga Zoram Beih A Nih Laia Zalenna Sualtute Dinhmun

R. Zamawia,
the then Defence Minister

Thu hmawr hawnna
Kum 1966-a buaina khan chhan leh vang mumal tak a nei a. ‘Hmakhawsang atangin Zofate hi India mi kan la ngai lo a, kan lalten thuneihna sang ber (sovereignty) neiin, an khua leh tuite chungah thu tawp neiin ro an rel tawh thin. British hnuaia kan awm lai pawh khan British India-a chhiar tel kan la ni ngai lo a; Burma emaw, hnam dang sorkar hnuaiah emaw pawh kan la awm ngai hek lo. British sorkarin min chhuahsan dawn lai pawh khan Mizoram chu zalen leh keimahni hmakhua atana duhthlanna neia tinsan kan ni tihte leh India ramah hian barhluih dan hnuaia lakluh mai kan ni. Chuvangin, khawvel sorkar hrang thiau pathum - India, Burma leh Pakistan hnuaia Zofate thendarha kan awm hi thil dik lo a ni a; India ramah rau rau pawh, Assam, Manipur leh Tripura state-ah te thendarha dah kan la ni leh zel hi a dik lo lehzual. Chuvangin, Zofate hi rorelna pakhat hnuaia kan insuihkhawm leh hi Siamtu Pathian min siamphung leh kan pianpui dikna chanvo ve reng a ni. Chutianga awm thei tur chuan ‘kan hmakhua atana duhthlan theihna (National Self-determination) chu kan pianpui dikna chanvo ve reng a ni bawk’ tih thu inchuhna avanga Zoram kha India nena buai ta kan ni.

Tan lak dan
Zofate thil ngiat chu, a policy tlangaupuitu leh kengtu MNF party policy leh duh dan angin, “MNF Party chuan zalenna a sualna kawngah, tharum thawh lovin (Non-violence hmangin) hma a la zel ang,” tih a nih avangin hetiang hian hma a la zui ta a ni:- (A tawi zawngin)

1. MNF Party chu din fel a nih hnuah, Mizoram leh Zofate dinhmun, an hmakhua atana thil tul leh pawimawhte Assam chief minister BP Chaliha chu hriattir thin a ni.

2. Kum 1964, April thlaah India Home Minister G.L Nanda chu biak a ni a. Zalenna leh mahnia ro inrel thei tura duhthlanna ( National Self-determination) chu Zofate lungkham ram a nih thu hriattir a ni a; mahse, chutiang thu chu ngaihthlak tlakah a ruat lo.

3. India Prime Minister Lalbahadur Shahstri-a hnenah, October ni 30,1965-ah, Zofate lungkham ram leh an pianpui dikna chanvote chu, thlahtu bul atanga chhuichhuakin leh chutih hun lai thlenga India Union-a Mizoram leh Zofate an tel ve tak mai dan te leh chung thilte chu thu thaa chinfelsak ngei a nih theih nana hma la nghal tura ngenna Memorandum thehluh a ni.

4. January ni 19, 1966 (Thawhlehni)-ah India Planning Commission Member, Tarlok Singh-a chu Aizawlah a rawn zin a. Mizoram leh Zofate dinhmun chungchang sawipui a ni.

5. February 2, 1966-ah Assam Governor, Vishnu Sahay-a chu Aizawlah a rawn zin bawk a. Zofate inzawmkhawm lehna thu etc. sawipui tum a ni a, mahse, a biak hleih theih loh.

6. A hnuhnung berah chuan, February ni 7, 1966 (Pathianni)-ah Patashkar Commission Aizawlah an lo kal a. Heta an hotupa ber HV Patashkar-a hi India Union Cabinet Minister hlui leh Hills Commission chairman dinglai a ni. (Nehru Plan of Autonomy for the Hill Areas of Assam) A tawi zawnga Nehru Plan or Pattern chu min rawn sawihmuh a ni ber. Mahse, kan Hnam Damna tak tak leh Zofate lungkham ram thleng pha chuang lo tura inham buai chu tul lova ngaih a nih avangin pawm a ni ta lo a ni.

A thu hrimah, ‘Mipa leh lawichal chu inrin reng tluk a awm ngai love,’ tih a ni a. A tir atangin kan Ram leh Hnam dinhmun tur chungchang hi thu thaa sawifel mai theih a nih beiseina a sang hlei thei lo a. Chuvangin, a tha lam leh tha lo lama inpuahchahna hi a thuanga kalpui a ngai a. Chutiang chuan hma lak chhoh ve zel a ni.

Chu bakah, a hmalam atanga thil awm dan ngun taka thlirin, thu tha ngawt chuan India sorkar hi koh ei tak tak chi ni dawna a lan tak lovah chuan, thil a nih ang ang chu hmachhawn thei turin inpuahchahna a kal chho tel ve zel a. Chungte chu a bul deuh atangin a tlangpui chauh lo thlir tel leh thuak thuak teh ang:-

MNF Party hi October ni 28,1961 (Inrinni) zanah din a ni a. A hruaitu tur Office Bearers leh Executive Committee Member turte pawh tlem tlem chu ruat nghal an ni. Chung mite hmalakna chuan kum 1962, April 2-3 ah Aizawl Cinema Hall (Krishna Talkies)-ah Inkhawmpui (Convention) koh a ni. Party Gen. Assembly hmasa ber erawh chu October 22, 1963 (Thawhlehni)-ah neih a ni. He Assembly rorel thu tihtluk ang hian Volunteer din a ni a; Aizawl Hqrs-a mite chu Central Volunteers tih an ni. A boruak kal chho zelin a mamawh tak avangin, kum 1965 September thla chawhnu lamah Mizoram Sorkar Lailawk (Provisional Govt. of Mizoram) din a ni leh a. Hemi atan hian Danpui (Constitution) pawh siam nghal a ni bawk.

He Sorkar Lailawk hi President thu berna, (Presidential form of Govt) kalphung ang deuha duan a ni a. Democracy lungthu/lungphum pathum: Executive, Judiciary leh Legislature a awm a. Executive chu President-in a ho a, Judiciary chu Chief Justice-in. Legislature chuan Parliament In hnih a nei a; chungte chu: Aiawh In (House of Representative) leh Upa In (House of Senate) tia vuah a ni.

Hengahte hian sorkar kalphung leh inrelbawlna atana department leh thil tul ang zawng zawngte chu siamfelin, a theih ang tawk tawk chu a mawhphurtu turte pawh ruahman fel nghal vek a ni. A hmatheh bulpui ber tur nia lang, Volunteer Department chu Defence Ministry hnuaia dah a ni a. Volunteer pawh tuna Mizoram State pawn lam, Burma (Myanmar) leh Manipur State-a Zofate luah bial thenkhatte thlengin din a ni. Chu bakah National Volunteer Organisation siamfel a ni a; Guerrilla Battalion pawh sawmhnih chuang zet siam a ni nghal bawk. Chungte chu rawlrala indo dan (Guerrilla Warfare leh Tactics) te zirtir an ni.

A hma lama sawi tawh angin, Mizoram leh Zofate dinhmun tur chu thu tha maia chinfel theih ni dawna a lan tak si loh avangin, Mizoram Sorkar lailawk-a hruaitu pawimawh zual deuh deuh mi 10 (sawm) P Lalnithanga ina January ni 14, 1966 (Ningani)-a inkhawm chuan a hnuaia thutlukna hi an lo siam ta a ni:-


Mizoram Independence puan tur thu tihtluk a ni

“Mizoram leh Hnam chanvo dik tak, Siamtu Pathianin a pek, Duhthlan theihna leh Zalenna chang ve tura India prime minister Lalbahadur Shahstri hnena Memorandum thehluta a lo thlen tawh chu, tharum thawh lova beih tura tih a ni a.

“Tunah he kumthar (1966) kan lo hmang chho leh ta mek a, Kan Hnam dikna chanvo chu min pek tum ahnekin, nghet lehzuala min awpbeh tumin, India sorkar chuan, a sipai tam zawk a rawn thawn lut mek zel a. Inkhuar nghet turin hmun hrang hrangah hma an la nghal zel bawk a ni.

“Chuvangin, kan dikna chanvo, zalenna leh Mizo Hnam zahawmna humhim tura tan kan lak ve mai chu thil tihmakmawh a ni ta in a lang. Harsatna khirhkhan zawk leh chhiatna nasa zawkin min chimpil hma ngeia Mizoram Zalenna kan puan hi a tul ta niin a lang bawk.

“Chutiang tur chuan kawng hrang hranga mawhphurtu zawng zawngten chak taka hma lo la tura tih a ni. A hun leh ni (Zero Hour & Date) chu President kutah awm se kan ti,” tih a ni.

A chunga thu tihtluk tawh ang khian February 26, 1966 (Inrinni) zanah president Laldenga leh a cabinet member-te inkhawm chuan February 28,1966 (Thawhtanni) zanlai dar 12:00 chu Operation Jeriko tan hun atan a ruat ta a ni.

Ralthuam Dinhmun
Hetih laia zalenna sualtute ralthuam neih chu a hnuaia mi ang hi a ni:-
1)Light Machine Gun (L.M.G)-2s
2) ‘303 Rifles-101
3) Thompson Sub-Machine Gun-3
4) Beretta Sub-Machine Gun-40
5) Sten Sub-Machine Gun-15
6) ‘303 Rifle hlui siam that-1
7) ‘45 Revolver(Webley)-3
8) ‘32 Beretta Pistol-1
9) ‘22 Revolver (9 shots)-1
10) 9mm Lunger (German)-1(Private)
11) ‘32 Pistol-1(Private)
12) 36H.E Hand Grenade-150 vel
13) High Explosive (TNT)-100 Kgs
14) Local Arms-(?) (A mu a tam lo)

Heng ralthuamte hi Aizawl, Lunglei leh Champhai-ah te sem a ni a. India sipai hmun danga mite chu local arms leh a hruaitute thiam dan dana beih emaw, hualbeh mai mai rih tura ruahhman a ni. Aizawl, Lunglei leh Champhai-a India sipai hmunte hi lak ngei tura ruahhman a nih avangin, Out-Post dangte chu a hnu lama lak zui leh mai tura ngaih a ni thung.

Hetih hunlaia India sipai Mizoram chhunga awmte chu: 1st Assam Rifles, 5th Border Security Forces leh Assam Police(Armed leh Civil) an ni. Henghote rawn thalthuam tur hian sipai Battallion hnih dang (Sept. 1965-ah) rawn thawn luh belh tum mek a ni a. Mahse, China ral leh Pakistan nena buaina avangin an tum anga hmain an thawn thei lo. 18th Assam Rifles erawh an rawn thawn lut hman. Henghote hi Mizoram hmun hrang hrang - Aizawl, Lunglei, Champhai, Tuipuibari, Marpara, Khawzawl Darngawn, Vaphai, Hnahlan, Tlabung, Chawngte, Sangau,Hnahthial leh Tuipang-ah te hmun nghet neiin an inkhuar a. Chu bakah Silchar leh Aizawl inkar, Aizawl leh Lunglei inkar kawngpui khaw thenkhatahte B.R.T.F. leh Civil Police te an awm nual bawk.

Operation Jeriko leh Jet Fighter chet Dan Tlangpui
Kan thupui hi “Bomb hmanga Zoram beih...” tih a ni na a; “Jet Fighter hmanga Zoram beih...” tih nen danglam tehchiam lo turah ngai mai ila a remchang zawk mah awm e.

Champhai: Champhai Assam Rifles Posts hi Champhai, Buangtlang leh Hmunhmeltha inkar lai tak vel, Keifang tlanga awm a ni a. Lo ruahman lawk tawhna ang taka lak chian bal chu he Post chauh hi a ni. Beih tura tih hunbi tuk, zanlai dar 12:00-ah an che hman bik chiah lo chungin, zing dar 2:00 velah an che tan a. ‘303 Rifles 7, Sten Gun 4 leh Hand Grenade 10 vel kengin a hmatawngah mi 250 vel an kal a. A fei luzuma Volunteer 48 chuan minute 7 (sarih) chhungin an la fel hman vek a ni.

Lunglei: Lunglei 1st A/R leh 18th A/R inpawlh Wing Hqrs chu thil engemaw avangin barakhaih hman an ni lova. 5th B.S.F. Wing Hqrs leh Armed Police te chu ruahman lawk ang chiaha lak a ni. Assam Rifles-ho nen chuan Feb.28, 1966 zanlai pelh hret atangin chhun leh zan inzawmin inkah a nii a. March 5, 1966(Inrinni) zing dar 10:00 rik hma deuh hretah Assam Rifles-ho an inpe ta a ni. Champhai leh Lunglei Post atanga an ralthuam mankhawmte hmang hian hmun hrang hranga India Sipai Out-Post te chu beihzui an ni a. Mahse, India sorkar chu Jet Fighter leh Bomb hmanga an rawn thawhzui tak zel avangin an mi leh sa te chu an rawn chhan chhuak ta hlawm a ni.

Aizawl Lak a ni lo
A chhan hrang hrangte avangin Aizawl 1st. Assam Rifles Bn. Hqrs chu lak a ni lo chauh pawh ni lovin, lo ruahman lawkna angin February 28, 1966 zanlai atanga beih a ni ta lo hrim hrim a. Ni thum leh zan thum lai inralrinna leh inpuahchahna hun pek an nih hnuah, March 3, 1966(Ningani) zan dar 9:00 velah beih tan a ni hram. A tuk Zirtawpni nilengin silai ri a chawl lo. Hemi ni March 4, tlai dar 3:00 velah chuan Aizawl Police Station leh Jail vengtu, Armed Police thenkhat leh Assam Rifles-hote chu A/R hung chhungah an tlan lut ta vek a. Zalenna sualtute chuan jail leh thana chu an luah zui nghal a, jail chhunga MNF party executive member leh block hruaitu chuta tangte chu an chhuahtir vek a. Tang dangte pawh a duh apiang an chhuahtir nghal bawk.

Aizawl chhim leh hmar lama tangten chanchin an inhrilh tawn reng a. Tin, Assam Rifles-ho zing atanga lo tlanchhuak a, Volunteer-a rawn inpete hnen atangin A/R-ho dinhmun tlangpui chu an hre thei bawk a. Tui leh chaw an tlakchham avangin an buai hle a; inpek mai te pawh rawtna a awm niin hriat a ni. March 4, (Zirtawpni) zanah pawh hian A/R hote inpe tawh mai tura auh leh hriattir an ni a. Chumi tuk, March 5, (Inrinni)-ah pawh an la inpe duh lo anih chuan, chumi zan dar 12:00 velah chuan chhim leh hmar lam atangin thapui thawh beihpui thlak tum a ni. Mahse, hei pawh hi a tlawh leh ta.

A chhan chu : Hemi ni (Inrinni) zing dar 10:00 pelh hret velah hian Indian Air Force Jet Fighter paliin an rawn chhan tak vang a ni.

Jet Fighter hmanga bomb leh kah
Zoramin zalenna a sual chungchangah India sorkar-in Jet Fighter meuh hmanga beih hmasak ber chu Aizawl khawpui hi a ni a. Heng a Jet Fighter rawn hmante hi khang hun laia an indo thlawhn a neih that ber ber, Toofanis (France siam) leh Hunter (British siam) te an ni. Tin, an leidote enthla a, thla la turin 101 Vampire Fighter an ruai tel bawk. Toofanis fighters-te hi Tezpur leh Kumbirgram-a (Silchar bul) hmunpui nei an ni a. Hunters erawh chu Jorhat khaw daia hmunpui nei a ni thung.

March 5, 1966(Inrinni) zing dar 10:00 pelh hretah heng indo thlawhna palite hian Aizawl chung zawn an rawn thleng a. Vawi khat an vir kual a. A vawi hnihnaah chuan Mizo Hnam Sipaite tanhmun pui ber, Tuikhuahtlang chu an thlawhna laipui Puakrang (Air cannon/Front Gun) chuan an duhtawkin an kap a. A tlang pum pui chu a khukin a khu rum rum mai a ni. Vawi engemaw zat virkualin Mizo Hnam Sipai, Zalenna sualtute chu an kap zel a. A vawi hnihna emaw, a vawi thumna zawk emawah chuan bomb lian ve deuh tak hi an rawn thlak a. Pakhat chu a puah that chiah loh avangin a tlakna lai tak hmuh/hriat chian a ni lo a, pakhat chuan Aizawl circuit House a deng fuh a. A bomb puah rualin in chu a chim awp rup a, a kang zui ta hluah hluah mai a ni. Hetiang hi Rocket Propeller (bomb) ni a sawi a ni.

Hemi hnuah hi chuan pahnih te te in an rawn thawk nawn sek a. Hengte hi Armed Police veng Republic venga C Pahlira in leh a vel in thenkhatte an kap alh/ an bomb alh a. Tin, Khatla Bazar phei zawng zawng an bomb alh vek bawk. Dawrpui veng lam erawh chu an kap ve tho nain a kang ve rih lo.

Hetiang hian tlai dar 3:00 thleng rawkin Aizawl khawpui chu beih a ni a. Chawhnu lama lo thawkte hian Thakthing bazar an kap/an bomb alh ngei a ni tih hmuh a ni. Thlawhna laipui puakrang ri leh bomb ri a rin em avangin an kap alh nge an bomb alh tih pawh hriat hran a har hle. Dawrpui bazar phei hi chu March 6, 1966 (Pathianni) tlai leh thimhlim velah A/R ho hal belh nia hriat a ni. Tin, March 6, Pathianni tlaiah hian Silchar lam atanga India sipai lo kalten Aizawl an rawn lut bawk.

Thi leh Hliam
Aizawl inkahnaah hian thi leh hliam an awm nual a. India sipai lam a thite cu hriatpui vek a har hle a. Mizo lama thite pawh tute nge an ni tih hriat chian theih loh pawh an awm nual. An vaiin ruang 13 phum ni a hriat a ni a. Heng mite hi Jet fighter kah leh Bomb vanga thi nge silai dang kah vanga thi tih hriat hran hleih theih a ni lo. A tam ber chu Aizawl hmar lam chana mite an ni a. Tuikhuahtlang leh a chhehvelah chuan Mizo lamah thi an awm hriat a ni lo va. Volunteer zinga mi Noliana leh Saihlira erawh chuan Jet Fighter kah/bomb avangin hliam na chhe lutuk lo an tuar.

A lan dan ringawtah chuan khatiang taka kah leh bomb kan nih avangin,mi sawmhnih/sawmthum rual lai thihna a ni a; chumi let aia tam mah hliam pheng phungna awm tak a ni. Mahse, a ni lo. Pathian venhimna kan dawng ngei tih loh rual a ni lo.

Hmun dangte
An sipai Out-Post engemaw zat chhan nan India sorkar-in Jet fighter a hmang a, chungte chu: -
1) Tuipuibari: February 28, 1966 zan atangin hual beh an ni a. March 10-ah Jet Fighter in a tanpui tak avangin tinsan an ni.
2) Marpara: Chawlhkar hnih dawn lai hualbeh an ni a, Jet fighter avang bawkin March 10/11-ah tinsan an ni. Thi leh hliam an awm lo ve ve.
3) Khawzawl Darngawn: March 1, 1966 atangin hual beh an ni a. March 6, (Pathianni) atangin Jet fighter-in a pui nasa hle a, March 11 (Zirtawpni) thlengin zing leh tlai lamah a bei thin. Hemi Zirtawpni zanah hian tinsan an ni a, Sgt. Lianthuama (Tualte) 2 Inches morter bomb vangin chan a ni.
4)Hnahlan: March 2 atangin ni 10 thleng hual beh an ni a, March 9 leh 10 ah Jet fighter in a rawn tanpui a. Rothuama, s/o Awithanga a dulah hliam a ni a, thi an awm lo. Hnahlan khua leh tualchhung mite dim baksak lova Jet fighter in a beih avangin in 167 leh buh dahna chhekin leh sikul lamin a kang fai vek a. Thangkima s/o Ngulkhama, Lalruatthangi (kum 7 mi) D/o Chhawnlinga a thi a, a nu Lianthuami ban khingkhat bomb-in a per tliak bawk. Rualbanlo, mahni insaseng ve thei lo, Thangvela chu in kangin a kanghlum bawk. Hnahlan khua hi Jet fighter-a kah leh bomb-na tuar ber pawl an ni.
5) Tlabung: Tlabung Police Station chu awlsam te a lak a ni mai a. Mahse, A/R leh BSF sipai te Out-Post a awm bawk a. Hei hi Lungleia ralthuam mante kengin March 6-ah inpe mai tura thlem an ni a. Mahse, Jet fighter in a rawn tanpui ta tlat a. Nitin vawi thum zel ,zing dar 7:00, zing dar 10:00 leh tlai dar 2:00-ah te a rawn tanpui avangin lak a ni ta lo. Jet fighter lo thlen veleh chhum/tiauchhum a lo zing ve nghal thin a. Chuti ni lo sela chuan Volunteer lam pawh an thi tam viau mai thei a ni. Jet fighter vanga thite: Vala(Lunglei Rahsi veng), Thanthuama Sailo (Tuisen), Lalhlima(Tlabung) leh Valcheng khaw tlangval pakhat Hand Grenade tihpuah palh avangin Zawngauva leh Thangkima (Bunghmun Bn. amite) an thi bawk .Hliam: Biakmawii(Volunteer nula) leh Brig.Gen.Lalngura te,Tlabung ah hian`Jet fighter vang liau liauvin Volunteer pali ngawt chan an ni.
6) Sangau: He post hi 130th. MNV Bn. Darzo tum tura ruat a ni a. Camp pawn lama kal chhuak A/R sipai pasarih hnen atangin ‘303 Rifles pasarih leh a mu tam fe leh Hand Grenade sawm vel an mansak. Heng hmang hian an hual bet a. Lunglei laka an ralthuam mante kengin volunteer dangin an pui hman thelh a. Mahse, March 7, 1966 (Thawhtanni) ah Jet Fighter-in a rawn pui a. Sangau veng hmawra in tlemte tihloh chu a kap alh/bomb alh deuh vek a. March 8, Thawhlehniah an tinsan ve ta a ni.

A tlangkawmna
Keini Mizoram ram zimtea mi tlem te te chunga India sorkar thil tih duh dan hi a mak tih loh rual a ni lo. Kum 19 chhung vel lek India khua leh tui nihna Zofaten kan tem chhin a. Kan hlimna, kan himna, kan sakhua leh kan hmakhua zel atana kan pianpui dikna chanvo, Siamtu Pathianin duhthlan theihna min pek chu, “Min pe let leh ta che u,” kan tih vang maia heti taka min nghaisa duh ta mai hi mihring rilru pangngai atanga chhuak a ni thei ang em tihte thleng pawhin a ngaihtuah theih awm e.

India sorkar ngaihah chuan, Zoram leh Zofate tana Zalenna sualtute hi ‘hel’ kan ni a. Zalenna sualtute ngaihah erawh chuan, khatih hun laia India sorkar kha, ‘hnam tenau leh tlem zawkte an pianpui dikna leh duhthlanna pawh hmang thei lova awpbettu’ an ni ve thung a. An hnenah Zalenna sualtute thu thlen hi, thu thaa chinfelpui ai chuan, sipai chakna hrek belh tuma ngaih an ni bawk.

Hun kal tawh chu kohkir leh theih ni tawh lo mah se, thil tihsual erawh chu siamthat leh theih a ni.Midangte dinhmuna mahni indin chhintir loh phei chuan, a tu lam ve ve tan pawh thil hriat fiah leh hriat thiam a har thin. Khatih hun laia India Home Minister, G.L Nanda-a’n, “Kan thuneihna hnuaia hmanrua kan neih ang zawng zawng hmangin, action na thei ang ber helhote chungah lak a ni ang,” tih thu a han chhak chhuak mai te kha, midangte dinhmun a hriat loh thlakzia tarlangtu mai niin a lang. Tunlai sanah lek phei chuan khatiang khan khawvel sorkar lian leh ropui ber berte hian ti ta theuh sela chuan khawvel hi engtin nge a awm tak ang le? Ngaihtuah tham fe a awm ngei ang le!!

Tunlai khawvelah chuan, ‘Lungpui pawh lungtein a kamki loh chuan a awm thei lo,’ tih thufing ang deuhin, ram lian leh ram te zawkte, sorkar ropui leh tenau zawkte pawh tumah mahni maia awm thei leh ding zo kumkhua tur a awm theih tawh lova, chuvangin, U.N.O General Council chuan, kum 2007 september 13-ah ram leilung fate tana an pianpui dikna chanvo chungthua thupuan (U.N.O’s Declaration On the Rights of Indigenous Peoples) alo siam hial tawh a. India ram ngei pawh he thil hi dik leh tha tia pawmtu ram a lo nih ve tak avangin zalenna sualtu, Zofate tanna dik, thudik chu chiang lehzuala tarlanin a lo awm ta a ni.
Mizoram leh Zofate hi India ram atang hian kan indang emaw, dang lo emaw, pawh ni sela, a chunga U.N.O thupuan hi remchanga kan hman thiam phawt chuan, Zofate tan hian hnam anga dinkhawchhuahna leh inchimralna lak ata himna kawng khat chu kan chang thei a ni tih kan hriat a pawimawh hle mai. Hemi atan hian kan thawh loh erawh chuan tute mahin min pe lui ngawt dawn lova, tan kan lak thiam erawh chuan he thil avang hian hlawhtlinna kawng a inhawng zau lehzual ta a ni. He thil hi, sekibuhchhuak ni lovin, hreipui khuai tu thei ni ngeiin a lang. Hawh u, thu thaa chinfel theihah na na na hi chuan tan i la ngam hram teh ang u. Hei hi kan Ram leh Hnam damna tur a ni si a.
Powered by Blogger.