Header Ads

Recent Post
recent

UN-in Burma hruaitu hrenbeh dan kalh a ti

United Nations chuan Burma sipai sorkarin an rama democracy tundin duhtu pawl, National League for Democracy hruaitu Aung San Suu Kyi a hrenbeh dan chu dankalh a ni a ti a, an thiltih dan chuan khawvel ram dan leh Burma ram dan ngei pawh a palzut niin a sawi.

UN working group-te chuan Suu Kyi chu a rang thei ang bera chhuah zalen turin an ngen a. Suu Kyi chungchang ngaihtuahtu panel chuan Burma ram danah chuan an ram himna tichhe theia rinhlelhte chauh thubuai neilova hren theih niin an sawi a, hei vang hian Suu Kyi hren zui zel theih a ni lo niin an sawi.

UN working group chuan Suu Kyi house arrest-a dah a nihna nikum 2008-a pawhsei leh a ni chu dan palzutna a ni a ti a. Suu Kyi hi Burma dan, 1975 State Protection Law hmanga hrenbeh niin, he danah hian an mi hrenben chu a rei berah kum 5 chauh hrenbeh phal a ni. A tan hun hi May 2008 khan a tawp tawh a ni. Hei bakah hian Suu Kyi man a nih chhan diktak chu hrilhfiah turin a ngen bawk.

Hetihlai hian Washington-a awm, Suu Kyi-i legal counsel Jared Genser chuan Burma sipai sorkar chu UN thurawn avang chuan an danglam a rin loh thu a sawi a. UN thuchhuah chu thil pawimawh tak ni mah se, Suu Kyi chu chhuah zalen a nih mai a rin loh thu a sawi. Burma sorkar chuan UN-in dan kalha che-a a puhna leh, Suu Kyi hrenbeh chhunzawm zel anih chungchangah engtinmah a chhang let lo niin a sawi bawk.

Suu Kyi-u ukil, Kyi Win pawhin vantlang tan leh ram himna atana mi hlauhawm a nih loh avangin hrenbeh a nih chhan chu thudik lo niin a sawi a. A tan hun chhung pawhsei na thupek an tihchhuah apiangin thuneitute chuan engvanga pawtsei nge an nih tih an sawilang ngai lo niin a sawi bawk. Nikum October thla-a a tan hun pawhsei a ni chu ngaihtuah nawn leh tura a ngenna pawh tun thlengin thuneitute chhanna an la pe lo tih a sawi.

Kar kalta khan UN human rigths investigator, Tomas Ojea Quintana chuan Burma sipai sorkar chuan politics avanga a mi man, mi 2,000 chuangte chu chhuah zalen tur leh, Suu Kyi hrenbeh a nih dante chu ennawn turin a lo ngen tawh bawk a. Hei bakah hian human rights thawktute chuan Suu Kyi leh mitang dang, 2,100-te chhuah zalenna tura ngenna an siamah mi 888,888-te signature lak tumin an bei mek bawk.

Nobel Peace Prize chawimawina pawh lo dawng tawh, Aung San Suu Kyi hi kum 13 chhung house arrest-a dah a ni tawh a. Khawvel ram hrang hrangten chhuah zalen turin nawr reng mah se, Burma sipai sorkar chuan a hrenbeh hun hi a pawtsei leh zel a ni.
Powered by Blogger.