Bru Revolutionary Amry ten Zarzokima kaphlum : Sorkar hi tharum hmanga koh eih chi a ni lo : HM


Zirtawpni chawhma fehrehsan vel khan Mizoram khawthlang lam, Mamit district chhung Kawrthah leh Kanhmun inkar Bungthuam khuaah Bru Revolutionary Union (BRU) hnuaia Bru Revolutionary Army (BRA) nia hriat ten Zarzokima (17) s/o Lalngilneia chu huana a vawkchaw lak laiin an kaphlum.


He thil thleng hi Home Minister R.Lalzirliana chuan sorkarin pawi a tih takzet thu leh amah ngei pawh a barakhaih thu a sawi a. Bru te hian Lungawilohna nei an nih chuan political emaw, official level atanga tharum thawh kher ngai lova chinfel theih dan kawng ngaihtuah theih a ni, a ti. Sorkar chu tharum thawha koh eih chi a ni lo tih sawiin, November ni 16 atanga sorkarin laklet leh a tumnaah he thil thleng hian harsatna a siam ang em tih pawh sawi thiam a har ta hle a ni, a ti.


Thudawnna sawi dan chuan nimin zing dar 9:45 vel khan Zarzokima hi BRU nia inchhalte hian a vawkchaw la lai chu a nghawng leh a darah an kap a, ka pawh chhawn lohin a thi nghal a ni. He thil thleng an hriat veleh hian khawtlang inpun-khawmin Police lam pawh hriattir nghal an ni a. Khaw hnaivai Borai, Kanhmun, Zawlnuam, Kawrthah leh Mamit atangin Police leh IR engemawzat thawnluh nghal an nih thu Dingluaia, Mamit District SP chuan a sawi.


Zarzokima ruang hi Zawlnuam-ah postmortem tura lak nghal a ni a, nizan khan tlaivarpuiin vawiin hian an khua Bungthuamah hian vui a ni ang. BRU nia insawi ten an kahna silai hi eng ang silai nge tih chu enfiah tura tih a ni a, a kaptute hi mi pahnih khat mai ni lo, pali panga vel an nih ngei a rinawm tiin Mamit atanga thudawn chuan a sawi.


BRU nia inchhal te hian lehkha them an hnutchhiah a, heta thu inziak tlangpuiah chuan Tripura-a Bru raltlan nia sawi-te lakkir (repatriation) chungchanga an lungawiloh thu a ni ber tih thu dawn a ni a. Police te hian tual thattute hi theihtawp chhuaha zawng nghalin, he thu buatsaih lai thleng hian rinhlelh man an la awm lo a. Lehkha hnutchhiahah hian Hachhek Range Commander tih ziahlan a niin, heng mite hi BRU hnuaia Bru Revolutionary Army (BRA) nia sawi an ni bawk.


Mamit SP chuan, “Pawi khawihtute hi meikawhin n tlanchhia a nih a rinawm a, ngawrh taka zawn mek a ni. Tripura Police lam pawh kan bepawp reng,” tiin thil sual titute zawn chhuah kawngah dan leh thupek kengkawhtute tanpui zawnga kal hram turin mipuite a ngen tih a sawi a. “Dan bawhpelh zawnga chetna hian thil tha lo leh buaina lian zawk a thlen palh theih avangin tute mah ‘a’ taka an chet duh ka ring lo,” a ti.


He thil thlen hma lawk hian a bial fanga zin mek Lalrinmawia, MLA leh amah zuitute chuan Bungthuam-ah hian tukthuan an ei a. Bungthuam an chhuahsan hnu lawk hian Zarzokima hi kahhlum a nih avangin MLA leh a thuihruaite lo lambun tum an ni thei ang em? tih zawhna a awm nghe nghe a. Mahse, Police venhimna nena kal an nih avang leh, an tam tham deuh avangin heng misualte hian an bei ngam ta lo a ni mai thei, tiin thudawnna pakhat chuan a sawi.


Bialtu MLA hian Nilai zing khan Aizawl chhuahsanin a bial a fang a, Bungthuam-a Mizo tlangval kahhlum a nih avang hian an zin programme zawng zawng pawh cancel nghal vek a ni tih thudawnna chuan a sawi. He thu buatsaih lai hian bialtu MLA hian Bungthuam khua hi a thutchilh mek nghe nghe.


Mizoram Bru Displace People Forum President Elvis Chorky pawh he thil thleng chungchangah hian biakpawh a ni a. “Keini pawh min barakhaih khawp mai. Awmze neia sorkar nawr kan tum mek lai leh, repatriation chungchanga lungawilohna awm mek lai remchanga hmanga hetiang thil a thleng hi kan dem a, thil tisualtu manchhuah kawngah Mizoram sorkar puih kan inhuam reng a ni,” tiin The Zozam Times a hrilh.


He thil thleng avang hian nunau leh mipui pawisawi lo chungah tawrhna thleng lo hram se an duh tih MBDPF president chuan a sawi a. “Kan lo hriat dan chuan he thil thlenna rallehlam mai, Khapchang Camp-ah Mizoram lam atangin mi 70 vel chu chemtum leh talhtum nen an lut ni awmin kan hria a, mi tamtak an hreng mek niin an sawi,” tiin thil chiang tak erawh an la hriat bik loh thu leh, thil tisualtu ni lo nunau leh mipuite chungah tawrhna thleng lo se kan duh takzet a ni, a ti bawk.


Tripura-a Bru raltlan nia sawite hi Mizoram sorkar chuan November ni 16, 2009 atang hian Mizoram lamah Mizoram mi leh sa dik takte lakkir tan tumin ruahmanna a siam a. Hemi chungchang sawihoa tunhnai lawka Mizoram sorkar Home Commissioner, Central lam aiawh leh Bru hruaituten Aizawl-a inbiakna an neihah Bru hruaitute chuan sorkar ruahmanna chu pawm harsa an tih thu an sawi a. Inbiak tuk lawkah ‘repatriation’ hi boycott a nih thu chanchinbu thenkhatah tihchhuah a ni.

Zarzokima thihnain MZP leh CYMA ngeng a chhun !

Bungthuam tlangval Zarzokima kahhlum thu hian Mizo Zirlai Pawl leh Central YMA hruaitute ngeng a chhun hle a. Meeting hmanhmawh neiin nimin vek khan lamkal an intir chhuak nghal a ni.


MZP chuan thuchhuah siamin, “He thil thleng hi MZP chuan na a tiin kutthlak tute hi a dem takzet a, Mizoram sorkarin Tuikuk, anmahni duhthu ngeia Mizoram chhuahsantute Mizoram mi leh sa ngei lakluh a tum laia hetiang thil thleng hi Mizo mipuite zahlohna leh chonaah MZP chuan a ngai a, a rang thei ang bera Tuikuk misualte hi chhuichhuaka na taka hrem turin sorkar a phut a ni,” an ti a. “Sorkarin lakluh a tum laia hetiang thil a thleng hi MZP chuan Tuikuk te Mizoram-a an lo luh duh lohzia entirnaah a ngai,” an ti bawk.


Meeting zawh veleh hian president VL Krosshnehzova hovin Office Bearers dangte leh hruaitu thenkhat mi 20 rual vel chuan nimin tlai la la khan Zarzokima vui tur leh ral turin Bungthuam an pan nghal a ni.


Central YMA Office Bearers pawh president Lalchungnunga hovin nizan khan Central YMA Office-ah an thukhawm nghal a. Vice president C.Zoramliana leh CEC member pahnih te chu Bungthuam-ah hian thil awmzia hrechiang tura tirh liam nghal an ni bawk.


Central YMA hian thuchhuah siamin, ‘Pawisawilo Mizo tlangval misualin an kaphlum hi Central YMA chuan pawi a tiin a ngaithiamlo hle,’ an ti a. Hetianga mi pawisawilo nunna hial lak a ni hi a titu zawngchhuaka an phu tawk hremna pek ngei an phut tih tarlangin, “Tun hnuah hetianga pawisawilo misual kuta tawrhna a thleng leh a nih chuan a tul angin Central YMA-in hma a la ang,’ an ti.


Hetih rual hian mitlawmngai leh thahnemngai, chhiat tawkte thlamuana an thlavang hauha lamkalte chungah CYMA chuan lawmthu a sawi a. Misual zawn kawngah pawisawilote tawrhna thlen lo tura ngenna te, hmalakna kawng hrang hrangah Central YMA thu leh hla ngaichang tura mipuite an ngen thu te an tarlang a ni.

Post a Comment

Previous Post Next Post