Inbiaknaah lungawiloh thu an sawi lo : Home Commissioner


November ni 4, 2009-a Mizoram sorkar leh Bru (Tuikuk) raltlan nia insawi hruaitute inbiaknaah chuan Bru aiawha telte hian an lungawiloh thu an sawi lo a, inbiakna neih zawh hnu-ah chanchinbu atangin an lungawiloh thu chu an hre ve chauh tih he inbiakna kaihruaitu Home Commissioner Lalmalsawma, IAS chuan a sawi.


Home Minsitry-in ti tura a tih angin Mizoram sorkar chuan Tripura-a Refugee Camp 6-a awm mek Bru ho Mizoram-a an kir leh dan tur Road Map a siam a, hei hi Union Home Secretary hovin September ni 23, 2009-ah sawiho a ni a, ruahmanna tlangpui chu pawm a ni tih sawiin, “Ruahmanna hi tlem tlema tihdanglam hret hret theih tura ngaih a ni,” a ti.


Road Map-a ruahman dan tlangpuiah chuan Bru ho lolet turte hi tum khata suanchhuah vek theih an nih dawn loh avangin a tahtawla lakchhuah tura tih an ni a, a theih chin chinah an awmna thin hluiah kir leh se, a remchang lo a nih pawhin an awmna thin Assembly Constituency chhungah kir leh se tih a ni.


Hei bakah hian Elector Photo Identity Card nei tawh leh E/Roll-a hming awm tawh sate lalut hmasa in, document nei lote chu a tul anga verification tih chhoh nise tih a ni.


Kawnga a kal laiin an kâp


Home Minister-in nimina chanchinthar lakhawmtute a kawmnaa tawiawmtu Hachhek bialtu MLA Lalrinmawia Ralte, Parliamentary Secretary ni bawk chuan a bial fan laia Bungthuam khuaa Bru hel nia inchhal ten Zarzokima an kahhlum chungchanga a thu hriatte a sawi a. Zarzokima kah a nih lai hian silai ri hre phak chu an tlanchhe deuh vek a, B.Lalrinsanga, Bungthuam chuan Zarzokima tlu lai hmu in a ban te pawh a la vai a, ama lam hawi zawnga silai a rik avangin khaw lamah a zualko ta zawk a ni, a ti.


Zarzokima kah a nih hma lawk hian Kanhmun atangin Bungthuam khua hi an paltlang thu leh he thil thleng a hriat avanga a kirleh nghal thu a sawi a. ‘Vawkchaw la tura tirh a ni a, a tluk dan atangin kawnga a kal lai kah niin a lang. Zarzokima’n hmeichhe naupang hruai nei anga sawi erawh chu a diklo,’ a ti bawk.


BRA te chet dan hi amah beih tumna a ni thei ang em tia sawi chu zeldin thu a nih a ring a, “Kei min lo beih nachhan tur ka hre lo,” a ti a. He thil thleng avang hian a bial fan programme pawh cancel vekin Bungthuamah hian a kir leh nghal niin a sawi.
Previous
Next Post »