ACHR Fact Finding Team-in CM ngaihdam an dil

Tuikuk raltlan nia sawite chungchang leh tunhnaia Mizoram khawthlang lama tualthihna leh a nghawng nia ngaih, In engemawzat kang chungchang enfiaha lokal Asian Centre for Human Rights (ACHR) Fact Finding Team intite chuan tukin zing khan ACHR Director Suhas Chakma hovin Chief Minister Lal Thanhawla an kawm a. Tuikuk chungchang chiang tawk lova thuchhuah an siam avangin CM hnenah hian ngaihdam an dil.


ACHR Fact Finding Team-te hnenah hian Chief Minister chuan Tripura-a Tuikuk raltlan nia sawite Mizoram-a lakkir leh chungchangah Mizoram sorkarin harsatna engmah a neih loh thu leh, hetih lai hian raltlan nia insawite zawkin harsatna an siam thin thu a lo hrilh a. Tunhma pawhin Tuikuk ten Mizote chunga kut an thlak pawhin Mizoten engtinmah an tilet ve ngai lo a, tuna Tuikuk leh Mizo inkara inhriatthiam lohna lo chhuah chhan pawh Tuikuk lamin pawi an khawih hmasak avangin sorkar chet hman hma in mipui thinrimin an lo chet hman vang a ni, a ti.

Tripura Sakhan tlangdunga Mizo-te, an khua atanga hnawhchhuah an nih thu CM hian ACHR hotute hnenah hian a hrilh a. Mizoten nasa taka Tuikuk laka an tawrh ve thu te, tunhnaia buaina avangin tunah pawh Tripura-a Mizo thenkhatin vauna an tawh thu te leh, a hman remchan hmasak berah an thlavang hauh tura Jampui tlangdung tlawh a tum thu te a sawi bawk.


ACHR Director Suhas Chakma chuan Tuikuk raltlante felfai taka Mizoram-a an luh lehna tura sorkar leh tlawmngai pawlte hmalakna chu tha a tih thu sawiin, Mizoram-a an kir lehna turah buaina leh harsatna a awm loh nan engtik lai pawha puitu nih an inhuam thu Chief Minister hi an hrilh, thudawnna chuan a ti a. Mizoram sorkarin venhimna a pek leh a enkawl zui dan tha tawka an hriat thu te, thup awm lova an hmuh duh ang hmuhtir an ni leh an kal duhna hmunte tlawhtir an nih avanga an lawm thu te, pawisawilote tawrhna tizangkhai zawnga sorkarin chhawmdawlna, tanpuina leh humhimna a pek te tha tawka an ngaih thu te sawiin, hetih rual hian In kang tuarte chu an buhte a kan vek avangin kumthar atan buh chi pe turin Mizoram sorkar an ngen a ni.


ACHR Fact Finding Team hian Zirtawpni khan Aizawlah tlawmngai pawl thenkhat khawmin, Inrinni khan Mamit leh Damdiai khua an tlawh a. Mamit-ah hian District Bawrhsap Zothankhuma kawmin, Damdiai-ah Tuikuk hruaitute harsatna an ngaihthlaksak a. Pathianni khan Tumpanglui leh New Eden khua te an tlawh leh bawk.


Chief Minister hi Home Minister R.Lalzirliana’n a tawimawm a. ACHR Fact Finding Team hi Director bakah Anthony Tago, Nava Thakuria leh Mangal Debbarma te niin, an zinga tel tura ngaih M.Kothari, UN Reporter hlui chu thlawhtheihna cancel vangin a rawn tel ve thei lo a, nimin khan Mizoram an chhuahsan leh tawh a ni.
Previous
Next Post »