Mizorama Krismas hmasa ber


-By Rev.V.L. Zawnga

Mizorama kût kan neihte zînga kan hlut ber chu Krismas hi a ni. Kan hman tan hun leh kan hman dân a bul tê atangin lo chhui ila. Ka hriat dân ka sawi mai dâwn a ni a, hriat dân dang nei chuan han ziak ve sela a lâwmawm ngawt ang.


Tipaimuka hman 1872:
Tipaimuk hi Tuivai chhuah tihna a ni a, vaiin Tuivai tih hi an lam thiam lova Tipai tiin an lam a, muk hi chu vai tawng a ni a, lui infinna lai hi a ni. A hmâr lam kam chu Mizoram a ni lo va, chhim lam kam erawhchu Mizoram a ni.


Kum 1872-a Vai lian, Mizovin Bawrhsâp lian kan tih mai thinah khân an hotu chu Eger a ni a. November thlaah Silchar an chhuahsan a, Tipaimuk-ah hian awmhmun an khuar a. Damdawi in an sa a, kudam te pawh an siam a. December 24 – 25 ah chuan Krismas an serh a, chawhlui pawh an kîlho bawk a. Krismas nia an inkhâwm laiin Vânbâwng lam mi Lalhleia hovin an rawn kâp a. Inkahnaah hian pali an hliam a ni. An duh angin Krismas nî pawh an hmang tha thei lo niin a lang. Tuiruang lui hmâr lamah camp hi an siam a nih chuan Mizorama Krismas hmang an ni thei lo vang. Chhim lam kama siam an nih erawhchuan Mizorama Krismas hmang an ni thei ang. Hmar lam kama siam an nih a rinawm zâwk. Hetih lai hian Mizote hi an la awp lova an tân chhim lam kam chu hmun râlti a la ni rih a ni. Heta Krismas hmangte hi hnam dang an ni a, English-ho hman dânin an hmang a ni. Heta Krismas an hmang hi Mizorama Krismas hmangah chhiar theih a ni meuh lo.


Vanlula khua (Bêlkhai?) a hman 1872:
Kum 1872-a Vailian kha thuang hnihin Mizoramah an lo lût a. Chhim lam atanga lo lût te tum ber chu Bengkhuaia ten Sâp naupang, Mary Winchester an man kha lâk lêt leh a ni. Tlabungah an lo chho a, an kal zêl a, December 14 (1872) ah Vanlula khuaah hian an inkâp a. T.H. Lewis-a sawi dânin chuan Mizo tlânchhe tûr chuan Vanlula khua chuan an hâl a ni a ti a. Pu Thansiama (L) Ex-MDC chuan Vanlula khua kan tih hi Bêlkhai khua a ni a ti. Ani hi hetiang lam ngun taka chhui thîn a ni a, a thu hriat hi a dikin a rinawm. Khuaa in chu a kâng zo deuh vek a, chutah chuan an theih anga thain camp an siam ta a. Chutah chuan Krismas an hmang ta a. General Brownlow-a chuan officer zawng zawng chu chaw eiah a sâwm a. T.H. Lewis-a chuan an Assistant Quarter Master ei tûr a siam tuizia a sawi uar hla a ni. English miten Krismas an hman thin dân angin hetah pawh hian Krismas an hmang a ni.


Hei hi chiang taka kan hriat, Mizorama Krismas hmanna hmasa ber a ni. Heta Krismas hmangte hi hnam dang an ni. An zîngah hian Thangluah lal Rothangpuia te an kal ve zêl a, Krismas hmanaah hian an tel leh tel loh erawhchu kan hre chiang thei lo.


Pûkpui khuaa hman 1901: Mizovin Krismas kan hman hmasak berna chu Pûkpui khuaah kum 1901 ah khân a ni a, Zosâpthara huaihawt a ni. Pûkpui khua hi Lunglei atanga hmâr lam mêl thum vêla hlaa awm a ni a. He khuaah hian kum 1899 December 18 atangin Kristian an awm tan a, kum 1900 Janaury thlaah midangin an rawn belh a. Kum 1901 ah hi chuan in 8 lai an ni tawh a. Kristiante chu a lu nungin 47 lai an tling tawh.


Zosâpthara chu kum 1901 October ni 23 ah Aizâwl atangin a chhuak a, Lunglei leh a chheh vêl khaw 40 vêlah a zin kual a. Pûkpui khua ami Pu Thankûnga (a hnuah Pastor a ni) te, Chhunrûma te leh Kawhtea ten an zui a. Hmun hrang hranga Kristiante chu Pûkpuiah kal khâwm tûrin an hrilh a. Hemi tum hian rei tak an thang a ni. Rev. J.M Llyod-a chuan hetiangin a ziak, “Rowland-a chu … October ni 23, 1901 ah thla thum thang tûrin a chhuak a … Pûkpui khuaah a châm rei ber a, Krismas a hmang a. Hmun hla taka Kristiante nên insuihkhâwmin Kristiante kût an lâwm a, Kristiante kût an lawmna hmasa ber a ni ang” tiin (History of the Church in Mizoram, by J.M Lloyd, phek 73).


Pastor Thankûnga (Buchhâwna pa) sawi, Rev. Challiana (Murray) lo ziak chhâwn dân chuan, “Kum 1901-ah Pûkpui lal Dâra kawt kâwnah Krismas kan hmang a, thut nân dâp kan phah a, Pu Rochawnghluta sial kan talh a, chutih lai chuan Kristian kan la tlêm khawp mai a, inchhûng khat chu kan tling” tih a ni.


Heta Krismas hmang kan hriatte chu – Chhîpphîr khaw bul, Zote lal ina awm, Challianbûki, Hlunzîki leh Pâwngi, Lungmawi khua ami Lalchhîngi, Rûmi leh Thangi te, Zosâpthara thuihruai te, Pûkpui khuaa Kristian awmsa 47 te, an vaiin 57 an ni. Ring lo mite pawh ruaithehnaah hian an tel a rinawm.

Hemi tum hian an inkhâwm pui nghâl a. Zosâpthara kha hla leh zai ngaina tak a ni a. Hla a zirtîr a, “Lal Isua hming i fak ang u” tih te, “Vâna arsite angin a lallukhum timawiin” tih te hi a zirtîr a. Chuvângin chutih lai vêla nau piang hmingah chuan Khumtîra tih te, Arsitei tih te hi an sa nghe nghe a ni.


Kum 1901 hi Mizo ten Krismas kan hman hmasak ber niin a lang.


Aizâwla Krismas hman hmasakna 1903/1905

Aziawla Krismas hman hmasak berna hun hi hriat dân a phir tlat mai a. Pastor Vânchhûnga lehkhabu ziak (phêk 3-naah chhunzawm)


(Mizorama Krismas)

“Lusei leh a vêla hnam dangte chanchin” phêk 287 – 289 ah Lunglei leh a chheh vêla ringtu awmte chu Aizâwla Krismas hmang ve tûra hruai tûrin 1903 ah Lianphunga nêna an kal thu a ziak a. An hman tak tak dân erawhchu a ziak lo.

Rev. Lalnghinglova lehkhabu ziak Zoram Nghahchhan ah chuan phêk 117-ah 1905 a hmang tanin a sawi. An hman dân pawh a ziak a. Zosâpthara te huaihawt a ni. Ruaitheh nân thangthlêng an kam a, an sava awhte chu an thawhkhâm a, vawk sûm nga an lei bawk a. Chhûnah chuan infiamna an nei a, tlaiah ruai an theh a ni. Hemi tum hi Krismas an hman hmasakna ber niin a sawi bawk.

Hetih hun lai hian Aizâwl lamah ringtu an la tam lo va, Rev. Liangkhaia ziak Mizo Chanchin, phêk 131-ah chuan kum 1899 ah mi pali in Baptisma an chang a, an zînga pahnih chu Khasi an ni. Kum 1900 ah chuan Baptisma chang an awm lo va, ring thar tlêm an awm, tiin a ziak a ni.

Thil awm dân han thlîrin 1905 hma lamah hi chuan Missionary pawh pahnih emaw chauh an la ni rih a, Krismas an la hmang mumal lo a ni ang. Rev. Lalnghînglova sawi hi chiang taka Krismas an hman kan hriat chu a ni. Hemi hma hi chuan Aizâwla Sâp awmte hian Krismas niin thingpui an inho a ni. Mahse chu pawh chu kan hre chiang lo.

Ka han târlan duh chu Mizo in Krismas kan hman hian a tîr atangin ruai kan theh zêl tih a ni. Kum 1901 ah Pûkpui khuaa an hman khân sial an talh a, kum 1905 ah Aizâwla an hman pawhin ruai an theh a, ruai theh nân thangthlêng an kam a, vawk sûm nga an talh bawk a ni.


- Baptist Church of Mizoram

Previous
Next Post »