Nagaland-in 1st World Bamboo Day thleng dawn

Nagaland chuan September 18 hian World Bamboo Organisation (WBO) in World Bamboo Day a buatsaih vawikhatna a thleng dawn.

World Bamboo Day hi Heritage Village, Kisama-ah neih a ni dawn a ni. He hunah hian thupui atan ‘Bamboo for Community and Livelihood’ tih hman a ni dawn a, Vice President, Dr M Hamid Ansari chu khuallian a ni ang.

WBD lawmna neih hma, September 16 leh 17 hian North East International Bamboo Festival hman a ni dawn bawk a, hetah hian ‘Bamboo for livelihood and community development,’ tih thupui hmangin seminar buatsaih a ni dawn a ni.

World Bamboo Day hman a nih tur thu hi nikuma Bangkok-a 8th World Bamboo Congress neih tum khan puan a ni a, hetah hian Nagaland Chief Minister, Neiphiu Rio kaihhruaiin Nagaland palaite an tel a ni. Rio chuan WBD vawikhatna, Nagaland-a hman tura ruat a ni chu lawmawm a tih thu sawiin, Congress-a presentation an pek that avangin an state chu WBD thleng tur hian thlan a ni, a ti. Rio hi Advisory Council of the World Bamboo Organisation member a ni mek bawk.

WBD-ah hian khawvel ram hrang hrang atangin palai 500 chuang an tel beisei a ni a, anni bakah hian ramchhunga state hrang hrang aiawte pawh an tel rin a ni bawk. He hunah hian Vice President Hamid Ansari Naga Heritage Village, Kisama honorary citizen atan puan tum a ni bawk a ni. WBD lawm rual hian Kisama-a Bamboo Heritage Hall chu hawn a ni dawn bawk a, intihlimna chi hrang hrang bamboo run, bamboo sports, bamboo music, food festival, bamboo planting, essay leh painting competition-te neih a ni bawk ang.
Previous
Next Post »