Sharmila hnenah Tagore Peace Prize hlan

Indian Institute of Planning and Management (IIPM), New Delhi chuan Irom Chanu Sharmila, 'The Iron Lady of Manipur' tia sawi thin chu chawimawina sang, Rabindranath Tagore Peace Prize a hlan. He chawimawina hi Manipur-a remna leh muanna a awm theihna tura huaisen taka a beihna avanga pek a ni.

IIPM founder director leh award selection committe chairman, Dr Malay Chaudhuri leh Registrar Ratna Cahudhuri-te chuan Inrinni khan Sharmila hi a awmna hmunah tlawhin, chawimawina hi an hlan a ni. He chawimawina hian tangka fai Rs nuai 51 bakah, gold medal leh thuziak a keng tel.

Rabindranath Tagore Memorial Prize buatsaih hi international award a ni a, a piancham 105-na, Inrinni khan hlan a ni. He chawimawinain a ken tel sumte hi Asia leh Europe-a institute leh university-ten an tum a, mimal emaw pawl emaw, economics, literature leh remna leh muanna atana thawk thate hnenah hlan thin a ni.

Malay Chaudhuri chuan, 'Sharmila chu India rama hmeichhia danglam zinga mi pakhat a ni. Boruak muanawm tak hnuaia huaisen tak leh tumruh taka a beihna avangin he chawimawina hi kan hlan a ni' a ti. Sharmila-i unaupa, Iram Singhajit chuan tangka fai a dawnte chu a Sharmila-in campaign a neih mek kaihhnawih thil programme hrang hrang siamna atan hman a ni dawn tih a sawi.

Sharmila hian kum 2000, November 2-a Imphal airport bul, Malom-a Assam Rifles-ten civil mi 10 an kahhlum avangin an state chhunga Armed Forces Special Powers Act (AFSPA) hman chu hlih phutin chaw ngheiin a nuar tan a, kumin November 1 hi chaw ngheia a nawrh kum 10 a tlinna tur a ni.
Previous
Next Post »