Header Ads

Recent Post
recent

Chief Minister in Hydro Carbon verh chhuahna tur Maubuang ah hawng


Aizawl, 7th July 2014: Chief Minister Pu Lal Thanhawla chuan vawiin khan Maubuang, Aibawk-I ah Oil India Limited (OIL) ina enkawl, oil leh natural Gas - Hydro Carbon- verh chhuahna tur, exploratory drilling well hmasa ber chu a hawng.

Hawnna inkhawm oil verh chhuahna tur hmuna buatsaihah Chief Minister chuan India hmarchhak state ah te hian oil leh natural gas thahnem tak a awm tih hriat a ni a ti a. Amaherawhchu, a zawnchhuahna hmanrua leh a ruhrel pawimawhte tlakchhamna avangin Digboi, Assama oil hmuh anih hnu khan a zawn hna hi a chak theilo a ni a ti a. Heti chung hian Central sorkar chu hmala tura a nawr reng thin thu a sawi a. Kum 2008 a sorkarna an rawn chan leh hnu atangin central sorkar hotute a ngen angin Mizoramah oil zawngtu company pathum ruahman a ni a ti a. Hmar lam chang turin ONGC pek an ni a, anni hian Meidum-ah natural gas hmu anga sawiin, tunah hian thawm an neih chhunzawm vaklo a ni tiin, kal chak tura an nawr reng thu a sawi a. Mizoram laili vel chang turin Oil India Limited hi thlan a nih thu sawiin, tunah hian Maubuang bakah Thenzawl ah te, Keifang ah leh Phulmawi ah te hma an lak mek thu a sawi a. Mizoram chhimlam chang tura Reliance Company thlan ten tun thlenga bul pawh an tan theih loh avangin central-ah company dang dah tura ngen mek a nih thu a sawi bawk a.

Chief Minister chuan oil leh gas zawnchhuahna tura ruhrel pawimawh Mizoramah a awmlo chungin leh
harsatna hrang hrang dang karah OIL in oil zawnchhuah hna a thawk tak tak tur hi a lawmawm hle a ni tiin, Mizoram tan chauh nilo, ram pum tan hlawkna a nih ngei a beisei thu a sawi a. A hlawkna tur pawh OIL leh Mizoram sorkarin inzatin an insem thin dawn a ni a ti. Chief Minister chuan kan ram leilung hausakna haichhuahna kawngah a leillung fate chu a neitu kan ni tih inhria a, heng companya thawktu turte hi a tulna apiangah tanpui a, an hnuaia kan thawk anih pawhin anmahni anga chhel tur leh thawh tur awm chhung zawnga thawk peih turin tualchhung mite chu fuihin, heng zawng zawng hi keimahni tan vek a ni tih kan hriat a tul a ni a ti a. Company hotute hnenah pawh tualchhung mi a tam thei ang ber chhawr thin tura a hrilh thu a sawi bawk.

Khualzahawm Pu H.Rohluna, Minister for Industries etc pawhin thu sawiin, tualchhung mite nen inngeih taka khawsa tlang tura ngenin, tualchhung miten an phak tawk ang inhlawhna siam sak thin turin company hotute chu a chah bawk a ni.

OIL hi oil leh gas zawnchhuah leh verh chhuah hnate bakah semchhuah leh thawnchhuah hnate a thawk ber a. Oil thlitfim lamah chuan a kal vaklo a ni.Mizorama hma an lakna hmun Keifang leh Phulmawiah te hian Civil Works chu an zo fel tawh a, Thenzawlah pawh a verh hna hi thawh theihin an peih tawh bawk a ni. Tuna an verhna hmun tur MZ-3, Maubuanga an bun oil rig hian metre 4500 a thuk a verh phawt anga, chutiangin a bulhnai hmun hnih hmun thumah metre 4500 a thuk zelin an verh dawn a, hemi atang hian engzahnge oil/gas awm(reserve) tih a hriat theih chauh dawn a ni. Tuna oil rig hi Sher No.3 tia vuah a ni a, tunhma lama lo hman tawh, la hman zel tur a ni.

OIL General Manager Pu Rahul Dasgupta chuan helai leilung awmdan hi engmah hriat lawkna an neih loh thu leh a tul anga geological leh geophysical surveys an neih chawp atanga oil zawn hna hi kalpui tur an nih thu a sawi bawk a ni.

Chief Minister hi Sports Minister Pu Zodintluanga, Minister of State for AH&Vety Dr.B.D.Chakma leh Parliamentary Secretary Pu Joseph Lalhimpuia ten an tawiawm a ni.
Powered by Blogger.