Header Ads

Recent Post
recent

Mi 66 te zangndawmna beisei avangin Court thu angin ram enfiah a ni dawn

Tuirial Hydro Electric Power (HEP) project khuah mekah mi 66-in zangnadawmna an beisei leh a, hei vang hian Court thutlukna angin an ram leh thlaite chu tuiin a chîm dawn leh dawn loh enfiah a ni dawn.

Mi 66-te hian Tuirial HEP tuikhuahin an ram leh thlaite a chîm chhe dawn nia sawiin, zangnadawmna pek an phût a ni. Thuneitu lam erawh chuan, mi 66 hnenah hian Tuirial HEP siam a nih avang hian an ram leh thlaite tuiin a chîm dawn loh thu leh, zangnadawmna dawng tur zingah telh an nih loh thu an hrilh.

Zangnadawmna pek loh tura tih an nih avang hian mi 66-te chu Gauhati High Court-ah an zualko a; an ram leh thlaite chu tuikhuahin a chîm ngei dawn tih a chian tawh thu sawiin, a hmuna endik turin Court-ah hian an dil a ni. An ram leh thlaite chu tuiin a chîm ngei dawn a nih chuan zangnadawmna an beisei a ni.

Court chuan tun hnai khan thutlukna siamin, mi 66-te ram chu tuiin a chîm ngei dawn em tih enfiah turin thutlukna a siam. Enfiah hna hi thla ruk chhunga zawh fel tura tih a ni a; enfiahnaah Land Revenue & Settlement department, Environment & Forest department, Power & Electricity department, NEEPCO aiawh, Aizawl DC leh ram neitute tel tura tih a ni.

Ram enfiahnaah hian mi 66-te chu an ram leh thlaite Tuirial HEP tuikhuahin a chîm dawn a nih chuan Land Acquisition Act & Rules anga zangnadawmna pek tur a ni a; a chîm dawn lo a nih erawh chuan, mi 66-te'n an hriat ngei theihna atan chanchinbuah enfiahtute thil hmuh chhuah chu tarlan tur a ni.

~ Source: Vanglani
Powered by Blogger.