Header Ads

Recent Post
recent

Mizorama oil & gas dinhmun zirho

Aizawl, 31 July: Geological Society of Mizoram (GSM) chuan nimin khan Chanmari YMA Hall-ah 'Disaster management & oil exploration in Mizoram' tih thupui zirhona an buatsaih a; Geology & Mineral Resources minister H Rohluna khuallian a ni.

H Rohluna chuan, sorkarin Mizorama oil leh gas (hydrocarbon) zawn kawngah theihtawp a chhuah mek zel tih sawiin, "Hmuh chhuah ngei kan ring a, beiseina sang tak kan nei. Oil & gas a rang thei ang bera lak chhuah a, mipuite'n a hlâwkna changa hmasawnna an neih hi kan châk tawh a ni," a ti.

GMR Minister chuan, lei hnuai hausakna hai chhuah tak tak hmain inpuahchah lâwk a ngai tih sawiin, oil leh gas zawn hna thawktu company-te nen ṭang tlangin Mizo naupangte IIT-a an zir theih nan coaching kalpui tura ruahmanna siam a nih thu a sawi a; GSM-te chu ram leilung zir chiang a, chhiatna laka invenna kawnga thurâwn pe turin a chah.

H Rohluna chuan, ram hmasawnna tura hmalaknaa harsatna siamtu ber chu zangnadawmna a ni tih sawiin, "Mipuite hian zir tur kan nei a. Sum hmuhna tur a nih dawn chuan dik lo taka tih duhna kan neih ṭhin hi sim a ngai, chuti lo chuan hmasawnna hna a ṭhuanawp phah fo dawn a ni," a ti.

Khualzahawm, Oil India Ltd.-a hotu Borthakur pawhin thu sawiin, Mizoram chuan lei hnuai hausakna ṭhahnem tak nei tih a sawi a; zirlaite chu geology zir ngawrh turin a chah.

Mizoram University-a Geology department associate professor leh GSM president Dr Victor Zochhuana Ralte sawi danin, Mizorama oil leh gas zawn hna hi kum 1980 velah ṭan a  ni tawh a, a tak taka zawn ṭan erawh chu New Exploration Licensing Policy 1999 hman a nih aṭangin a ni.

Kum 2003-ah ONGC-in Kolasib district-ah bul an ṭan a, kum 2007-ah Oil India-in Serchhip leh Aizawl district-ah an ṭan ve leh. NaftoGaz leh Reliance-in kum 2009-ah Lawngtlai district-ah bul an ṭan a, mahse anni hi chu an hna tihtawpsak tawh an ni.

Workshop-ah hian Mizoram University leh Pachhunga University College-a Geology zirlaite leh sikul naupangte an tel.
Powered by Blogger.