Mihringa sumdawnna thubuai 20 ziak tawh

Aizawl, 5 May: Mizoram police-a CID (Crime) chuan, kum 2000 atanga March 2016 theng khan mihringa sumdawnna (human trafficking) chungchangah thubuai 20 a ziak tawh a, a kaihhnawihah mi 42 an man tawh.

CID (Crime) chhinchhiah danin, mihringa sumdawnnaah hian Mizoramah chuan kum 2000-ah thubuai ziah luh tan a ni a, thubuai ziah luhte chu an chhui zui nghal zel a, thubuai 20 zinga 16 chu chhui chhuakin, Court-ah chargesheet an thehlut tawh a ni. Kum 2004 leh 2005 khan thubuai pali ve ve ziah luh a ni a; kumin March thla thleng khan human traffi cking tuartu mi 32 an awm tawh.

Hetih lai hian, thubuai chhui lai pakhat an nei a, thubuai dang pakhat erawh chu vanduaina thlenna hmuna police-te kutah an hlan thung.

CID (Crime) SP Lallianmawia chuan, hna thawh tur hmuhsak thei anga phai lam atanga inzuar company eng emaw zat an awm tih sawiin, chu'ng hna an zawrhte chu rintlak tak tak a awm laiin, rintlak loh leh mihringa sumdawnna atana hman tum an awm thin avangin fimkhur a ngai hle tih a sawi.

Lallianmawia chuan, Mizo thalai, Mizoram pawna hna thawk turte chu, an thawhna tur zir chiang hmasa phawt tur leh a rintlak leh rintlak loh finfiah hmasa turin a chah a ni.
Previous
Next Post »