Zangnadawmna pek phûtin KMMTTP kawng siamtute an dang

Aizawl 4 June : Lawngtlai District Land Ow­ners Association (LDLOA) chuan, Kaladan Multi Modal Transit Tran­s­port Project (KMMTTP) kawngpui  siam meka an ram lak a nih avanga zangnadawmna pek thuai phûtin June 1, 2016 aṭang khan hna thawktute an dang a; nimin khan Lawngtlai DC-in titàwp turin ngen mah se, an la chhunzawm zel.

Thu dawn danin, LDLOA hian an thil phût chinfel a nih hma chuan kawng siamtu RDS leh Atlanta ARSS Infrastructure hnuaia hnathawktute chu dan zel an tum a; buaina a chhuah loh nan Lawngtlai district thuneitute'n hmun hrang hrangah police an duty tir a ni.

LDLOA hruaitute chu June 2, 2016 tlai dar 5 khan Lawngtlai DC Dr A Muthamma chuan a pisaa léngah sáwmin, an thil phûtte a sawipui a; inbiaknaah hian Lawngtlai SP Lalsanglura, Election officer Lalhmansanga leh IPRO C Lalhruaitluanga te pawh an tel.

Lawngtlai DC chuan, ram neitute harsatna chu a hriatthiampui thu leh theihtawpa hma a lakpui tur thu a sawi a; sumah harsatna a awm lo a, LRS department-in zangnadawmna pek turte a la enfiah mek avang leh, Land Acquisition Act dan thar avangin thil a kal zung zung thei lo tih hrilhin, ram neitute chu an thil tih titàwp turin an ngen a ni.

LDLOA hruaitute erawh chuan, DC-in theihtawp a chhuahpui vanga lawm thu an sawi rualin, sorkar nawr nana an hmalakna chu kalpui zel an tum thu an sawi thung.

Mizoram PWD hotute sawi danin, KMMTTP kawng siamnaah mimal ram eng emaw zat lak a ni. A tira ram enfiahnaa ram neitu dik tak nia hriat mi 165-te chu zangnadawmna cheng nuai 927 pek a ni tawh a; mahse, a tira tel lo mi dang 800 velin an ram nei nia an insawi leh avangin J Sanghulha leh mi dang 146-te chuan an ram neihna lehkhate nen Gauhati High Court-ah petition an thehlut a ni.

High Court thuchhuak angin, ACB-in zangnadawmna diltu mi 800 zinga a zatve vel dilna chu enfiah tlaka ngaiin an enfiah a; chumi hnuah chuan Lawngtlai DC, district collector ni bawk chuan an thil hmuh dan report chu Mizoram sorkarah a thehlut a, thil inmil lo ṭhenkhat hmuh chhuah a nih avangin enfiah leh tura tih a ni.

Lawngtlai DC chuan, thil awm dan a enfiah nawnna report chu May 31, 2016 khan Mizoram sorkara Land Revenue & Settlement department-ah a thehlut nawn leh a, chu chu sorkarin a enfiah mek niin PWD hotute chuan an sawi.

Sorkarin a tihfel phawt loh chuan zangnadawmna sum an pe chhuak thei rih lo tih an sawi bawk.
Previous
Next Post »