Header Ads

Recent Post
recent

International Day of the Worlds Indigenous Peoples 2017 lawm

Zo Indigenous Forum chuan tahrik ni 9, August, 2017 khan Buarpui Community Hall-ah International Day of the Worlds Indigenous Peoples 2017 leh Asia Indigenous Peoples Pact (AIPP) Silver Jubillee (kum 25 na) lawmna an nei.

Indigenous day lawmna hun hi Cultural Program leh Indigenous Peoples chungchang te, UN Declaration on the Rights of Indigenous Peoples chungchang zirhona neih a ni a, ram leilung fate nihna hrang hrang bakah UNDRIP chhunga bung pawimawh tak tak te zirho a nih bakah zawhna leh chhana hun hman a ni bawk.

Hei bakah hian Asia rama ram leilunga inzawmkhawm pawl lianber Asia Indigenous Peoples Pact (AIPP) kum 25 tlin lawmna neih a ni bawk a, AIPP hian asia ram hmun hrang hrangah member 48 a nei mek a, member nih dil an awm reng bawk a ni. He Silver Jubille puala thupuanchhuah Declaration chu kalkhjawm mipui ten banpharin an pawmpui bawk.

Khawvel pumpuiah hian ram leilungfa (Indigenous peoples) mi maktaduai 370 aia tam awmin ram hrang hrang 70 vel zetah kan inzarpharh a, mahni a hnamzia, nihphung leh chin dan than te, inrelbawlna hrang neiin kan awm a, khawvel hmun tin kan dap kual tiin an sawi thin, chung zingah chuan the Americas (entirnan, Lakota hnam USA, Mayas hnam Guatemala, Aymaras hnam Bolivia), te Saami hnam Europe hmar lama awm te, Aborigines leh Torres Strait Islanders hnam Australia a mi te Maori hnam New Zealand ami te leh keini Mizo te ngei India rama mi te pawh kan ni a, heng  ram leilungfa (Indigenous peoples) te hi kan chenna rama mi nen khaikhin chuan nihphung leh ze danglamna bik kan nei theuh a ni.

Ram leilung fate dikna leh chanvo humhalh turin kum 2007, September ni 13 khan United Nations General Assembly chuan The United Nations Declaration on the Rights of Indigenous Peoples-a a passed ta a,  he thupuanchhuah nei tur hian kum 20 chuan rim takin ram leilung fate hian an thawk a ni. He thupuanchhuah hian khawvel puma ram leilung fa (indigenous peoples)  maktaduai 370 te tan zalenna dar a vua a, an nundan phung, hnamzia, leh sakhua te humhalha chhawmnun theihna turin 'rights' an nei tih puangin enhran, ngaihsak loh an nihna leh an human rights bawhchhiatnate laka humhalh dan tur a duang bawk a, ram leilung fate anmahni ram atanga nekchhuah, an ram chhuhsak leh chimralna lakahte a hum tur te, an ram chhunga thuneitu ni tur te a siamin sakhua leh hnam tana hmun pawimawhahte hian thuneihna an nei ang a, zirna pawh anmahni duhdanin an kalpui ang, a ti a ni.

Zo Indigenous Forum chuan UNDRIP chak lehzuala hma lak a nih theih nana Mizoram Legisltive Assembly in 8 October 2015 a resolution pass a ni chu lawmawm an tih thu sawi nawn lehin India sorkar leh Mizoram sorkar pawh he resolution a hlawhtlin ngei theihna atan a taka hma la turin a ngen nawn leh bawk a ni.
Powered by Blogger.