Vawiin a “Seminar cum Workshop on International Mechanisms and Inidgenous Peoples’ Issues” hmang tura lokal khawm zawng zawngte leh kan Resource Person te a hmasain chibai ka buk a che u.
Zo Indigenous Forum hi pawl naupang taka a la ni a, Kumin 12th February a din tan chauh kha a ni a, a dintu te pawh mi ropui leh michhuanawm tak tak te niloin thalai hlawm kan ni a, tumruhna leh beiseina nen, he pawl hi din kan ni a, Mizoram Societies Registration Act 2005 hnuaiah 14th April 2009 khan Registration a ni a, kan dilna hi tunah ngaihtuah mek a ni.
He pawl hi Politics tello, mimal hlawkna tur nilo, ram leh hnam thatna tur atana din a ni a, pawl thianghlim tak leh zahawm tak nih kan duh a, Politics thalo leh mimal hlawkna atan te, midang beihna hmanrua atana te hman kan phal dawn ngailo a, pawl zahawmna nei tur leh vawng nung turin theihtawp chhuah zel kan tum a ni. Thalai, kum lamah pawh la naupang tak tak te kan nih hlawm avangin kan pawl zahawmna min venpui a, min finchhuah turin turin vawina lokalkhawm zawng zawng hi a bikin kan sawm nghal che u a ni.
He pawl hian thiltum a neihte ti hlawhtlin turin ram leh hnam inpumkhatna leh inunauna thazawk siam te, hnam hnuaihnung zawk kan nih avanga kawng hrang hranga khawvel eng kan hmuh theihna tur leh kan chan ve theihna tura dikna leh chanvo te kan neih theih nan hmalak a tum a, ram leh hnam thatna atana nih chuan tupawh thianghlim takin kan thawhpui thei vek a ni, kan sawm nghal bawk a ni.
Kan rama hmasawnna leh infrastructure thar lo chuangchhuak mekte hi a pawng a puia kan do loh thu hi sawilan kan duh, amaherawhchu UN Declaration anga kan dikna leh chanvo neihte chan zawng emaw, tibo zawnga emawa hmalakna chi reng reng chu tha kan tiloin kan do tlat dawn a ni, heng hmasawnna te hian kan dikna leh chanvo tibo silo a engtiangin nge kan chhawr tangkai theih ang tih hi kan ngaihtuah tur pawimawh tak leh chumi mila kan lo insiamrem chu thil tul leh pawimawh tak a ni dawn a ni. Tunlaia sawihlawh tak Sairang thlenga rel lo lut tur chungchangah pawh Zo Indigenous Forum chuan kan duh leh duhloh thu kan sawilo a, amaherawhchu mipui te ngaihdan erawh chu ngaih pawimawhber nise kan duh a ni.
Khawvelah ram 70 ah keini ram leilungfate (indigenous people) te ang hi mi maktaduai 370 (million) vel kan cheng a, chung ziangah chuan Zo Indigenous Forum chhut dan chuan India, Burma leh Bangladesh a zo hnahthlak awm zawng zawng hi avaiin mi maktaduai 9-10 (million) vel kan ni a ni.Heng Zo hnahthlak te hian zaikhat luang siin mahni hnamzia leh nunphung mawitak kan nei theuh a, Kan hnamzia leh nunphungte chawi nuna chawikan bakah kan pi leh pu te atanga kan hnam rohlute vawng him a, kan tualchhuak damdawi te pawh hnamdangin neitu nihna leh hlawkna an tel a, an chan mai lohna turin theihtawpa hmalak kan tum a ni.
Kan pawl hian tharum thawhna leh chi leh chi inthliarna te hi a duhloin a do tlat a, tharum thawhna hian rah tha aiin rah thalo a chhuah thin avangin leh mimal dikna leh chanvo a chhuhsak thin avangin tharum thawn a chi reng reng chu kan do tlat a ni.
Zo hnam inunauna leh inpumkhatna, kan dikna leh chanvo chang tura hma lakna te bakah Universal Declaration of Human Rights te, UNO Millenium Development Goalte, UN Declaration on the Rights of the Indigenous People te leh UN Convention leh Protocol hrang hrangte a hlawhtlin theihna atan kan theihtawpa hmalak kan tum bawk a ni.
Vawiin ni a lokalkhawm zawng zawngte he pawl hi lo zawm turin ka sawm duh che u a, Workshop hi hlawk taka hmang theuh turin duhsakna ka hlan a che u.
Ka lawm e