PRESS STATEMENT
16th November 2009.
16th November 2009.
Mahni duhthu ngeia Mizoram chhuahsantu Tuikukte zinga Bru Revolutionary Union (BRU) ni a inchhalte’n Zarzokima kum 17, Lalngilneia Bungthuam fapa dt. 13th Nov 2009-a rawng taka Bungthuam dai a an thah chungchangah MZP General Headquarters chuan lusun chhungte leh Mizo mipui thlabar taka awmte thlamuan turin Aizawl chhuahsanin a hmunah a kal a.
Bungthuam thlen hma hian Mamit DC leh Police te ngenna angin inthen hrangin a then Mamit ah khawtlaiin, a bak zawngin a hmun hi zan dar 1:30 velah thlen a ni a, ruangchungah pangpar leh puana tuamin khawtlang hruaitute leh MZP Hqrs Zawlnuam leh MZP Sub-Hqrs Kanhmun hruaitute nen meeting neih chhunzawm nghal a ni. Hemi hnu hian tlaivara lumenna hmunah hun hman a ni. Dt 14.11.2009 (Inrinni) khua a var veleh tualthahna hmun hi tlawh a ni a. Tuikuk te chetna hmun hi ngun taka tualchhung mite nena thlithlai a ni a, tualthat tute’n inpuahchahna tha tawk nena Mizote chunga chet an tumna te thlir ho a ni. He thil thlen ni hian Tuikukte hian ruahmanna felfai tak an lo nei lawk a ni tih a lanna chu Bungthuam paltlanga nitin Mizoram chhunga hnathawk thin Tuikukte hi tumah hemi ni zing khawvar atang hian Bungthuam hi paltlang an awm lo.
Mizo tlangval pawisawilo Zarzokima ruang chunga Tuikuk thil tihdan hian Mizo min thamlohzia a tilang chiang hle. A kawng kal lai chu kawng sir atangin hnai setsawtah a nak vei lamah an kah hnuin a nghawngah an kap leh a, hemi hnu hian a lu ah silai kawmin an chhu zui leh bawk. A ban veilam zak hnuaiah lehkha ziak Bru Revolutionary Union Letter head hmanga ziah leh silaimu sahara tuamin an zep a, he thu ziak ah hian mizoram sorkarin duat taka an enkawlna chu ‘fahrawn anga ena puhin hetiang (inthahna) thil hi a thlen bultanna niin Tuikukte’n zalenna an hmuh hma chuan a thlen zel tur thu’ an ziak a ni.
Zarzokima vuina hi ropui takin hman a ni a, mipui tamtak pungkhawmin Mizo hnam tana nunna hlan tu hi thlah liam a ni a, he hunah hian pawl hrang hrang aiawha thu sawina hun hman a ni. Hemi hnu hian mipui pungkhawm te chuan Bungthuam community hall-ah public meting neih a niin hetah hian MZP President, CYMA Vice President te bakah Langkaih Group leh Taitesena Group YMA President ve ve in thu an sawi a. He tualthahna hian mipui rilru a tinat em avangin a tul ang anga hmalak an huam tih a lang chiang hle a ni. He hunah hian Mizo hnam tana huai taka Mizote kan penchhuak ngam angin, ngawih leh chawlh a tul hunah pawh hruaitute thu ngaichan ngam a tul thu tarlan a ni. Hemi hnu hian tluang taka Aizawl lam pana haw leh a ni.
He thil thleng chungchangah hian MZP chuan Zarzokima thattute hi a rang thei ang ber a man chhuah leh an chunga hremna lek ngei turin Mizoram sorkar a phut tlat a ni. He thil thleng denchhena Tuikuk leh Mizo tam takte chunga thil thleng hi an mahni duhthu ngeia Mizoram chhuahsantu Mizoram sorkarin lakluh leh a tum mek Tuikuk zinga lo let duhlotute thiltih niinMZP chuan a hria a ni. Mi pawisawilo te ru bova that duh thin tu, Mizote sum thap nana mi hmang hreh lotu Tuikuk te thiltih hi MZP chuan a dem takzet a ni.
Mizote tualzawl ngeiah tualthata vawi tamtak min rikrap hnua Mizo mipuite tih hmingchhiatna tura mahni nupui fanaute vau bet chuinga mahni chenna in pawh hal duh Tuikukte thil tih hi na takin MZP chuan a dem a, he’ng an thiltih zawng zawng hi dan kalh a nih bakah Human Right zahlohna lian takah MZP chuan a ngai a ni. Tin, Central sorkar pawh, vawi tamtak sum leh pai leh dinhmun tha ngiat nan Mizote ru bova, rawng taka sawisa a, pawi sawi lo thata dawt hmanga vawi tam tak Mizote min hektu Tuikuk right nge, remna leh muanna duha zawldawh taka Tuikukte lo enkawl tawhtu Mizo mipuite right a ngaih pawimawh zawk? tih hi MZP in a zawhna a ni.
Heti taka Mizo mipuite chunga che duh Tuikukte lakluh na tura vawiin a bul tan tur Mizoram sorkarin a thulh ta chu lawmawm a tiin he’ng Tuikuk duat taka tuamhlawm hi Mizo mupuite leh Mizoram sorkar mawhphurhna ah MZP chuan a ngai lo a, anmahni duhthu ngeia tlantau Tuikukte hi anmahni duhthu ngeia hel nawn lehin Mizote chungah dim hauh lovin an che nawn leh a ni tih a chiang a. Mizorama lo lut leh tura ngaihtuahna sen niin Mizote tana hnawksak Tuikukte Mizorama an awm lohna tura hnathawh hi Mizo hnam him nan Mizoram sorkar leh Mizo mipuite tihturah MZP chuan a ngai nghet tlat a ni.
Hetih lai hian he thil thleng denchhena tualthattu zawngchhuak lo leh Mizo mipui thlabar thlamuan lova, hnam thlavang hauhtu Mizo tlangval zawk mana an awm hi MZP chuan a dem takzet a, mi State Police leh Politician-te’n hnam rilru pu a an thiltih dante thlira hna thawk turin MZP chuan hnathawktute a duh takzet a ni. He’ng mi mante hi a rang thei ang bera thu delhkilh awm lova chhuah nghal turin MZP chuan thuneitute a ngen nghal bawk a ni.
Issued by : Mizo Zirlai Pawl, General Headquarters; Aizawl : Mizoram.