Joel Dawnga Lungtau
Manipur Mizote History a dai tawh ngai lo tur 1st Mizo Meet chu tarik 9th Dec, 2011 khan Kawnpui, CCPUR a ropui takin Manipur Mizoten an hmang. He hun hi Mizoram CM Pu Lal Thanhawla te nupa, Pu. Chawngtinthanga te, President CYMA, President MZP Gen.Hqrts te leh ziathiam Mami Varte, Lawmi Khiangte, TBC Zaithanpuia ten an rawn hman pui ani. Tin, Manipur Zohnahthlak Minister te pawhin an rawn hman pui bawk. Khual lian atan Pu.Lal Thanhawla hman ani. He Mizo Meet hi Mizo People Convention(MPC), Manipur bultum a buaitsaih a ni.Mizo thiltih dang ang lo takin ahun taka programme tan ani a, Khual liante nupa chu Kawnpui khaw kawtchhuah – Kawn ah thalaiten Khual lam nen an lo hmuak a. Stage thleng an nupa hian zawn an ni bawk. He meet thil tum ber chu Manipur Zohnanthlakte inpumkhatna ani.
Khual lian Pu. Lal Thanhawla thusawi a langsar zual deuh te han thai lang ila :-
Nikum khan Zampui tlang a ka zin a, Zampuitlang Mizote pawhin Mizoram an ngai em em, mahse kan ram hi zauh zel tum kan nih avangin Insawn/suan an tum lova, chhel takin an tuar a, Mizoramah pem chhoh an tum bik chuang lo. Chutiang ang bawkin Manipur Mizote pawh, Manipur Sawrkar hnuaiah rinawm takin awm ula, Inpui(Mizoram) in nei a, Churachandpur hi Pathian in ram luah tur a pek che u ani a, luah lum tlat ang che u. Induhsak tawn reng chungin nun hmang ula, sawrkar ramri in min dang mahse, kan thinlung leh rilru chu min dang thei lo, insuihkhawm zai kan rel phawt chuan engtik ah emaw chuan Pathian in min la zawm khawm ang. Mizo te tan hian kan ban hi a tawi ngai lo. India ram hi Pathian in mission field atan a min pek a ni.
(Pu Hawla hian Zampui tlang dung zing report a pe a, Burma lam Mizo unaute ho pawhin Mizo convention ah an sawm thu, tel ve ngei a tum thu a sawi bawk a, Sakhan tlang dung MNF sawrkar lai a Mizoten kan chan tak chu lak let leh a tum thu a sawi bawk, kan sawrkar lai chu nise kan chan lo tur ati , Kum 3 chhunga Congress sawrkar progress report a pe bawk, NLUP etc. )
Mizo Meet analysis:
Khual lian, khual zahawm te hnen atangin thusawi ropui tak tak kan ngai thla, CM thusawi kha darkar 1 leh a chanve vel dawn lai ani a, a hun tam zawk kha Congress sawrkar achievement report pek thu deuh hlir ani, Manipur Mizote tan chuan a tangkai na em em ka hre hran lo, rawn campaign te pawh a ang deuh hlek hlek e. MNF hoten zalenna an sual tak te pawh kha a rawn sawi NIL chiang khawp mai.
President CYMA thusawi – ‘in ram neihchhun te hi in hralh tur ani lo’ ka thlawp khawp mai, tun lai hian CCPUR ah hian in leh lo hnamdang hnen a hralh an uar hle. CCPUR hi Pathianin kan luah tur a min pek ani si a.
President MZP Gen.Hqrts thusawi – ‘Mizoram leh Manipur inkalpawhna kawng (Guite road) hi siamthat ni ta se, tun ai hian kan inpawh zawk ang’, Mizoram CM leh Manipur tlangmi minister te hmaah Guite road condition a rawn sawi lang kha Manipur Mizo te chuan Thumbs Up kan pe e. Kan hotute beng thleng ngei se a duhawm hle.
Sawmbikte zingah khan Manipur sawrkar hnuaiah Mizo Officers kan neih te pawh an tel, mahse tumah an rawn lang lo. Mizo IAS 4, IPS 3 kan nei ve a, Manipur Mizote chuan kan thlamuanpui thin hle asin.(An rawn tel thei lo anih pawhin, thupha tal chu rawn chawi awm tak).
Mizoram lam atanga zaithiam rawn kal Mani Varte, Lawmi Khiangte, TBC-a te zaiin mipui beng a fah hle, Zohnahthlakte inpumkhatna lam hawi zawnga Mizo Meet hi buaitsaih ani a, hla sak tur an thlang fuh lo deuh in ka hria. Lengzem lutuk lam ai kha chuan Hnam hla tha tak tak kan neih te kha min han hlui zawk ta se, Mizo Meet nen pawh a va in mawi dawn em. Lawmi Khiangte in ‘Chhul khat kual’ leh ‘Mizo tlangval’ tih hla rual U zawkte hnuk ti ulh thei khawp a a rawn sa kha Thumbs Up kan pe e.