Saipuma police leh mipui innawrnaah IR Police-te'n silai an hmet puak

June 18, 2015-a Thingdawl, Kolasib district-a nu pakhat, thláma pawngsual tuma puh Lalhlimpuia chu police kuta a awm hnuah Thingdawl mipuite'n Saipumah police kut aṭangin chhuh an tum a; nasa takin police nen an innawr buai a, mipui hnawhdarh nan police-te'n silai an hmet puak.

Thu dawn danin, Lalhlimpuia, Thingdawl khawchhuak, Salem veng, Aizawl nia inchhál chuan June 18 chhunah Thingdawl nu pakhat, loa feh chu pawngsual tumin thlámah a phuar bet a, mahse a khawih hmain mi dangin an thawm an hriat avangin Lalhlimpuia chu a tlanchhia a ni.

Lalhlimpuia hi June 20 zing dar 9 velah Thingthelh khuaah man niin, Thingthelh VC president kutah hlan a ni a, Thingthelh khawtlang hruaitute chuan chawhnu lamah Saipuma IR police-te kutah an hlan chhawng leh a ni.

Saipuma IR police-te'n Thingthelh aṭanga Lalhlimpuia an la, Kolasib panpui an tum chu Thingdawl mipui 100 rualin an ûm zui tih an hriat avangin Saipum lamah an kalpui a, police-te'n Saipum IR camp-a an chawlhpui chu nangchingin, chhuhsak tumin an innawr buai ta a ni.

Kolasib-a magistrate-te leh police hotute hnen aṭanga thu dawn danin, Thingdawl mipuite'n an nawr nasat em avangin police-te chuan mipui hnawh darh nan van lam hawiin silai an hmet puak a, hliam an awm lo. Police-te chu Mualvum leh hmun dang aṭangin an inchah belh a, zanah chuan police 100 vel an awm tawh a ni.

Thingdawl khawtlang hruaitute chuan, police-te'n silai ṭum thum, vawi sawm vel an hmet puak a, van lam hawi vek ni loin, lei lamah pawh an kap a, silai muin lei/lung nawi a kah per vangin YMA hruaitu pakhat chuan hliam tenau a nei niin an sawi.

Mipuite'n an phût anga Lalhlimpuia hmêl Thingdawl MHIP hruaitu mi pathumte hmuhtir a nih hnu leh, a tûk lama Kolasib Police Station-ah mipuite hmuhtir tura an inremsiam avangin mipuite chu Inrinni zan dar 11 velah an ṭîn darh. Lalhlimpuia pawh nimin zing khawvar tirhah Kolasib PS thlenpui a ni.

Thingdawl MHIP member-te leh tlangval ṭhenkhat chu Lalhlimpuia hmel hmuh tumin nimin chawhnu dar 3 pelhah Kolasib Police Station-ah an kal a; mahse Lalhlimpuia chu district jail-ah an lo dah tawh avangin Thingdawl mipui thinrim chuan Kolasib PS an tawng a ni. He thu buatsaih lai thleng chuan buaina leh harsatna lian tham a thlen hriat a ni lo.

~ Source: Vanglaini
Previous Post Next Post