Aizawl, 15 November 2017: Guwahti High Court, Aizawl Bench chuan Mizoramin kum 2016-a ram lakna dan a siam chuan sorkar laipuiin kum 2013-a ram lakna dan tho a lo duan tawh aiin ram laksakte dinhmun chhe zawk a tiam avangin Mizorama hman theih a ni lo a ti.
He thutlukna hi November 15, 2017 khan High Court hian a tichhuak a, he thutlukna irhchhuana thubuai chu rambuai nen a inkaihhnawih: kum 1966 khan India sipaite’n Lunglei District-a Lunglawn ram zau takah awmhmun an khuar a, tun thleng hian Assam Rifles te an la awm nghe nghe.
He ram neitu chhungkaw 156 te chuan kum 2011 khan sipaiin an ram a luahsak hi a pek let loh vek pawhin leisak rawh se tiin HC-ah ngenna an thehlut a, HC chuan sorkar laipui chu a ram luahte la (acquire) turin thu a pe a, khatih laia ram chhunga ram lakna dan awmchhun – Land Acquisition Act, 1894 – hmangin thla thum chhunga la fel turin thutlukna a siam a ni.
Mizoram sorkar chuan he thutlukna bawhzui hian kum 2012 July ni 5 khan thu chhuah a siam a, Assam Rifles Battalion awmna hmun atan a la dawn niin a sawi a, a ram neitute pawh hian hei hi an pawm thlap.
Mahse, Mizoram sorkar hian hma a la chhunzawm ta lo a, a chawlhsan lai hian sorkar laipui chuan ram lakna dan thar – the Right to Fair Compensation and Transparency in Land Acquisition, Rehabilitation and Resettlement Act, 2013 – chu duangin a pawm a, hemi dan hnuaiah hian kum 1894 dan hmanga ram lak tur chu lak tawh tur a lo ni ta a ni.
Amaerawhchu, Mizoram sorkar chuan Lunglawna ram hi la turin hmalakna a nei chhunzawm ta miah lo zel a, a ram neitute lungawi lo chuan HC an pan leh ta a.
HC-in an ngenna a ngaihtuah lai mekin Mizoram sorkar chuan ram lakna tur dan – Mizoram (Land Acquisition, Resettlement & Rehabilitation) Ordinance chu kum 2015 December ni 8 ah tichhuakin, a kum lehah dan puitlingah a hlangkai ta a.
Hetianga ram lakna dan inthuah (state sorkar dan duan leh sorkar laipui dan duan) a awm tak avang hian Lunglawn ram hi eng dan hnuaiah zawk nge lak tur ni ta tih chu HC hian a ngaihtuah tel a tul ta a.
Ram neitute ukil, PD Nair chuan state sorkar dan hi sorkar laipui dan aiin a chhiat zawk avangin hman tlak a ni lo a ti a, President of India in a la pawm lo bawk tih Court hma ah chuan a sawi a.
Mizoram sorkar ukil, Linda L Fambawl erawh chuan sorkar laipui dan hi Article 371 (G) hnuaiah Mizorama hman ngawt theih a ni lo a ti thung a.
Sorkar laipui ukil, Zairemsangpuii thung chuan sawi tur a neih ve lem loh thu leh HC thutlukna ang ang an zawm mai tur thu a sawi.
Ukil te thusawi a ngaihtuah hnu hian HC chuan sorkar laipui dana a inziah danin Jammu & Kashmir tih loh ram pumah hman tur a ni a, chuvang chuan he dan hi Mizoramah pawh hman tur a ni tih a chian rualin Mizoram sorkar chuan vawi khatmah helai thu hi a la hnial lo thung a ti a.
Tin, ram danpui chuan ram lak chungchangah Parliament leh State Legislature te’n dan an siam thei ve ve a tih bawk thu sawiin danpui hnuaiah Mizoram dan hian sorkar laipui dan hi a luahlan thei reng em tih chu HC-in a ngaihtuah a ngai a ti a.
Sorkar laipui dan zawk hian heti hian a lo sawi lang ve hrim hrim a: he dan aia tha leh zangnadawmna sang zawk pek theihna dan chu state sorkar te’n an siam ve thei a, sorkar laipui dan hian chutiang chu a luahlan lo ang, tiin.
Hemi awmzia chu, sorkar laipui dan aia zangnadawmna emaw, chhawmdawlna emaw, insawnna tur tha zawk emaw pe thei dan chu state sorkar in a siam thei a, sorkar laipui dan aiin a hmang zawk thei bawk tihna a ni.
Ama’rawhchu, sorkar laipui dan leh Mizoram dan khaikhin hian Mizoram dan hian zangnadawmna, chhawmdawlna leh insawnna tur tha zawk a pe lo tih a lang a, hei vang hian state dan hian sorkar laipui dan hi a luahlan thiang lo a ni.
Tin, ram danpui chuan Concurrent List-a thupui awm te hnuaia dan siam an inthuah a nih chuan a hman tur zawk thlan dan tur felfai tak a duang hrim hrim a, Article 254 chuan state dan leh sorkar laipui dan a inbawhpelh chuan a inbawhpelhna lai takah President pawmpuina neih a ngai a, chumi hnu chuan state in a hmang thei dawn a, he Article hi kum 2002 khan Supreme Court pawhin a lo sawifiah tawh a ni.
A tawi zawng chuan, Mizoram sorkar hian ram lakna dan a siam leh sorkar laipui dan ah hian inthuah a awm tih hre reng chungin Assembly Session-a an pass hnu kum khat ah pawh President pawmpuina a la nei lo mai ni lovin, a pawmpui theih nan President hnenah a la thawn lo hrim hrim tiin HC chuan a tarlang a, hei vang ringawt pawh hian he dan hi Mizoram sorkarin a hmang ngawt thei lo.
Chutih rual chuan state sorkar ukil in Article 371 (G) a sawi chhuah avangin High Court chuan he Article leh sorkar laipui dan hman theih leh theih loh inlaichinna a ngaihtuah leh a, Court ngaihdan chuan Article 371 (G) hi mipui hman atana sorkar ram lak nen inzawmna nei lo a ni a, he Article hian Mizorama chengte chanvo humhalh a tum zawk niin a sawi.
Ram lak hian ram neitu inthlakna kawk tehmeuh mahse, ram lak ah hian zangnadawmna pek a ni thin a, kalphung pangngaia ram inhlan chhawn ah erawh chuan a man pek a ni thin zawk, High Court chuan a ti a, lak leh lei chu a inang lo a ni, a ti.
Heng chhan hrang hrang avang hian state dan chu hman theih a ni lo a, Lunglawn ram pawh chu sorkar laipui dan hnuaiah zawk lak tur a ni tiin, HC chuan thla sarih chhunga zangnadawmna hlan fel vek tur sorkar laipui chu thu a pe.
Source: The Frontier Despatch