Aizawl, 8 February 2021: Sairang Dinthar VC leh tlawmngai pawl hruaitute chuan, an khaw ram chhung, Kolabari hmuna Indian Army hmunpui dah an duh loh thu thu an sawi.
Sairang Dinthar khawtlang hruaitute hian Inrinni khan Aizawl Press Club-ah thuthar thehdarhtute an kâwm a; VC president Sangkunga chuan, Kolabari-ah hian kum 2013 tàwp lam aṭang tawhin Indian Army hmunpui dah tumna a awm tih sawiin, "Kan hriat veleh khawtlangin duh lohna kan lantir nghal a, sorkarah ṭum eng emaw zat kan thlen tawh. Sorkar hmasain kan duh lohna min hriatthiam avangin hmalak zui a ni lo," a ti.
Kolabari hmuna sipai dah an duh loh chhan sawiin VCP chuan, "Dinthar veng mai ni lo, Sairang mi tam takin fûra ei an zawnna hmun a ni a, mi tam tak eizawnnain a tuar dawn. Sipai dah tumna hmun hnuai mai, Durlui chu balu lâkna kai leh pawl, chhungkua leh ṭhian ho tam takin intihhlimna atana an hman ṭhin a ni. Sipai an awm chuan civil mi leh sipai inkarah buaina a chhuak fo thei," a ti.
Sangkunga chuan, sipai dah tumna hmun chu NH-54, Aizawl leh Silchar inkar roadside reserve area leh Tlawng riverine reserve-a awm a nih thu sawiin, "Riverine reserve chhungah mimal ram neih sorkarin a phal tawh loh laia ram zau tak, ṭin 570 hmun lai pek an tum hi a mak hle," a ti a; Revenue leh Forest department dan siam chu sorkar bawkin a bawhchhiaa an ngaih thu a sawi.
Sairang Dinthar khawtlang hruaitute chuan, Aizawla sipai battalion pakhat awm pawh hnawk tih an hlawh thu sawiin, "Kan veng huam chhunga battalion khat mai pawh ni lo, battalion eng emaw zat infin khawm dah chu civil miin rei lo têah kan zo dawn lo. Mipui leh vantlang duh lo chunga thuneitu zawk leh chak zawk nih vanga inbarhluih emaw intihluih hi a ṭha kan ti lo," an ti.
Thuthar thehdarhtute kawmnaah hian Sairang Dinthar VC, YMA, MUP, MHIP leh Kolabari hmuna sipai dah duh lo pawl an din, Kolabari Ram Committee aiawhte an tel a ni.