Spa-a thawk tura Mizo thalaite lâk tumtu Naga pahnih an man

7th October : Bangalore-a spa pakhata thawk tur lâk tuma Mumbai atanga Aizawla rawn kal Naga pahnih - Aonupsi Jamit (27) leh Khuisang Ragui (29), Zycron Management Service, Mumbai te chu nimin khan police-te'n Hotel Chief, Zarkawt atangin an man a, nimin khan Court-ah hruai nghal an ni.

Aizawl Police Station-a police-te sawi danin, Aonupsi Jamir leh Khuisang Ragui te hi Mizo thalaite Bangalore-a Four Fountain Spa-a thawk tur mipa 20 leh hmeichhia 12 lak tumin October 5, Nilaini khan Aizawl an rawn thleng a; nimin khan interview an buatsaih a ni.

Nimina interview-ah hian Mizo thalai 80 vel an inlan a, chung zinga mi 16, mipa 13 leh hmeichhia 3-te chu lak an ni. Four Fountain Spa-a thawk tur an lakte atang hian security deposit Rs. 3,000 an phut a, hei hi an lak zinga mi pakua chuan an pe hman a; mahse police-te'n an man rual hian, security deposit an pek tawhte chu chhuhsak nghal an ni.

Police-te sawi dan chuan, Zycron Management Service hian Mizo thalaite hnenah hian, Four Fountain Spa-a thawk tur an lakte chu thla thum training tir an ni ang a, an training chhungin thla khatah Rs. 3,000 an hlawh ang a, an training zawh atangin Rs. 6,000 hlawh turin an sawi a ni.

Police-te chuan, spa-a thawk tura Mizo thalaite lak tumtu firm, Zycron Management Service hian company registration an nei lo tih an sawi a; thawktu an lâksak tur, Four Fountain Spa nena inremna mumal taka an siam hmuh tur a awm lo niin an sawi bawk.

Zycron Management Service mite hian Aizawlah spa-a thawk tur lak an tum thu leh an lakah fimkhur a ngaih thu, CHAN chuan Mumbai atanga an dawn avangin, police hotute an hrilh a; police hotute thupek angin, Aizawl PS-a police-te'n an man a, an man lai hian CHAN leh Zarkawt branch YMA hruaitute'n an tawiawm. Aonupsi Jamit leh Khuisang Ragui te hi ILP nei loa Mizorama lut an ni a, police-te chuan ILP dan bawhchhiat tiin an 'charge' a ni.

Nimina Court-a hruai an nih hian, Court chuan Rs. 50 chawitirin, an chhuah zalen a; mahse police lamte chuan Aizawla an awm reng chu mipui tan a him loa an hriat avangin, haw nghal turin an ti a, an hawna tur maxi-cab ticket-te pawh buaipuisakin, nimin tlai khan an hawtir nghal a ni.



Source: Vanglaini
Previous
Next Post »