Aizawl, July 12, 2018: Europe khawmualpuia United Nations hmunpui (headquarters), Geneva-a Expert Mechanism on the Rights of Indigenous Peoples hmanga châm mek, C.Lalremruata, Zo Indigenous Forum chuan vawiin khan thu sawiin, “Mizote hi hmun hran hranah awm mah ila kan inzawmkhawm thuai a beiseiawm,” a ti.
C.Lalremruata chuan Zofate chu India, Myanmar leh Bangladesh-ah thendarh an nih thu sawiin, rorelna pakhat hnuaiah an awm thuai a beisei thu a sawi a. October 8, 2015-a Mizoram Legislative Assembly-in UN Declaration thlawpna thu an pass thu sawi langin, “India ramah Mizoram Assembly chu UNDRIP support-tu awm chhun a ni, a ti a. Hetih rual hian India sorkar atanga bawhzuina a awm lo erawh chu pawi a tih thu a sawi bawk.
Kum 2017-a India human rights chungchang zirchianna, Universal Periodic Review (UPR) neihah India-in ram leilung fate chungchanga rawtna engmah a dawng lo chu thil pawi leh zahthlak tak a nih thu sawiin, “India-in a ram leilung fate dikna leh chanvo humhalh tura hma a lak lohzia tilangtu a ni,” a ti.
C.Lalremruata hian Thawhtanni khan Expert Mechanism on the Rights of Indigenous Peoples hman mek kaihhnawiha hun hmanna dang (side event)-ah thu a sawi tawh bawk a. He hunah hian India-in Sustainable Development Goal (SDG) a buatsaih mekah ram leilung fa (indigenous peoples) te a rawn leh telh ve an ni lo tih sawiin, “SDG chu mi rethei ber thleng thleng tur a ni,” a ti a ni.
Expert Mechanism on the Rights of Indigenous Peoples hmanga Geneva-a zin, C.Lalremruata hian UN Special Rapporteur on the Rights of Indigenous Peoples Victoria Tauli Corpuz leh UN Permanent Forum Permanent on Indigenous Issues Ms. Mariam Wallet Aboubakrine te pawh a kawm bawk.
~ Lunglen