Zo Indigenous Forum chuan vawiin August Ni 9, International Day of the World’s Indigenous Peoples a lo thlen hian zofa hmun tina awm te chibai a buk a ni. International Day of the World’s Indigenous People (9 August) hi UN General Assembly chuan December 1994 khan a vawikhatna atan hman tan turin a puang a, chuta tang chuan kum tin hman alo nita a ni. Khawvel pumpuiah hian ram leilungfa (Indigenous peoples) mi maktaduai 370 aia tam awmin ram hrang hrang 70 vel zetah kan inzarpharh a, keini zofa te pawh India, Bangladesh leh Myanmar (Burma) hnuaiah kan awm darh mek a ni.
Ram leilung fate dikna leh chanvo humhalh turin kum 2007, September ni 13 khan United Nations General Assembly chuan The United Nations Declaration on the Rights of Indigenous Peoples-a passed ta a, he thupuanchhuah nei tur hian kum 20 chuang rim takin ram leilung fate hian an thawk a ni. He thupuanchhuah hian khawvel puma ram leilung fa (indigenous peoples) te tan zalenna dar a vua a, nundan phung, hnamzia, leh sakhua te humhalh a chhawmnun theihna turin 'dikna' an nei tih puangin enhran, endawngna leh an dikna chanvo bawhchhiatna laka humhalh dan tur a duang bawk a, ram leilung fate anmahni ram atanga nekchhuah, an ram chhuhsak leh chimralna laka hum tur te, an ram chhunga thuneitu ni tura siamin sakhua leh hnam tana hmun pawimawhahte hian thuneihna an nei ang a, zirna pawh anmahni duhdanin an kalpui ang, a ti a ni.
Kum 2015 October Ni 8 khan Mizoram Legislative Assembly India ram state zinga hmasa ber tur leh tun thlenga la awmchhun ni turin United Nations Declaration on the Rights of Indigenous Peoples (UNDRIP) thlawpna thu alo passed tawh a, hei bakah hian India Constitution Article 371 (g) hnuaiah hung bikna leh hamthatna tam tak kan nei bawk a, heng te hi zirchiang a, tha zawk leh tangkai zawk a hmang turin mi thusawi a innghat mai lova mahni ngeiin chipchiar taka zirchiang a hmang tangkai turin kan mithiam te leh mitin kan sawm a ni.
Kum 2019 hi UNO General Assembly chuan ram leilungfa te tawng humhalhna kum (International Year of Indigenous language) atan a puang a, chumi tih hlawhtlinna kawng pakhat atan chuan tunah hian zofa hnam hnih te tawng chu dahthat tura buipui mek a ni a, mithiam leh a duh apiang te nakin thlenga an zirchian theih turin tunah hian Zo Indigenous Forum chuan a buatsaih mek a ni.
Pipu atanga kan hnamzia leh nunmawi keimahni a bet tlat - Taihmakna, Rinawmna leh Huaisenna vawng nung zel tur leh khawvelah hnam ropui kan nih zia tilang thei tura mitin in buatsaih turin kan sawm bawk a ni.