Press Release
Dated Aizawl, the 18th September 2020
Tunhnaia Mizoram chhunga awm Assam Rifles mi leh sa te'n dân pawh pawisalova an chetna hrang hrang chungchangah, Zo Indigenous Forum chuan hriatthiam harsa a tiin, Mizo mipuite zah lohna leh kan dikna chanvo palzutnaah kan ngai a. Mipuite thlamuana venghimtu turte'n mipui tân harsatna an siamsak fo mai chu hriatthiam harsa kan tiin, thleng nawn tawh lo se kan duh hle a ni.
September ni 12, 2020 chhûn dar 12 vel khan, 17th Assam Rifles Major pakhat chuan he'ng Mizo driver pahnih - Lianfuha (kum 24) S/o T. Manghrina, Pangkhua leh Kapremthanga (kum 35 years) S/o Kimnona, Sangau 1, Zion Veng, Lawngtlai District ve ve te chu Hrangchalkawn bulah nasa taka kut thlakin Kapremthanga phei chuan a bengah harsatna a tawk viau a ni. Assam Rifles mi leh sa dang te'n an ṭhelh ngai hial khawpin a che a ni. He pawisawilo khawihtu Major hi a rang thei ang bera a chunga dân anga action la turin Assam Rifles thuneitute kan phût a ni.
Tin, August ni 15, 2020, tlai dar 4 vel khan Assam Rifles te'n Sesih khua, Champhai District-ah hmeichhe pasal nei lai pahnih chungah mawi lo tak leh an zahawmna tibawrhbang zâwngin an lo che tawh bawk a. He thilthleng avang hian Champhai Police Station-ah Case No. 87 of Dt 20.08.2020 U/S IPC 254/354(A) 354 (D)/509 ziahluh a ni a. Zo Indigenous Forum hruaitu Pu C. Lalremruata chuan Mizoram State Commission for Women-ah he thilthleng avang hian August ni 20, 2020 khan complaint alo thehlut tawh bawk a. Pawikhawihtu chunga action lâk a nih theihna'n 23rd AR Headquarters DIG hnenah September ni 9, 2020 khan Warrant of Arrest tihchhuah a ni tawh a. Tun thleng hian he'ng mite chungah hian action lâk a la ni lo nia hriat a ni a, rang taka an chungah dân ang taka hmâ la turin thuneitute kan ngen bawk a ni.
Mizoram-ah remna leh muanna a awm hnu atangin buaina engmah tawk lovin kan awm a, amaherawhchu Assam Rifles mi leh sa te'n mipuite tân harsatna an lo siam fo tawh ṭhin, tunhnaiah AR mi leh sa te'n Mizoram sorkar ruahmanna leh mipuite himna ngai pawimawh duh lovin Vairengte Check gate an lo paltlang lui tawh bawk a. Nikum lamah pawh Vathuampui khua, Lawngtlai District chu tuma tlawhpawh theih lohvin an khua an lo hreng tawh bawk a.
Rambuai lai ang maia mipuite chunga an duh duha an che ṭhin hi, Mizoram hi rambuai emaw an la ti niin a lang a ni. Kum 1986 khan remna kawng kan lo zawh tawh a, Mizoram hi Disturbed Area a ni tawh lo a, Armed Forces Special Powers Act (AFSPA), 1958 hi Mizoram-ah hman a ni ve lo tih Assam Rifles mi leh sate hi kan hriattir a ni.
He'ng a chunga pawikhawihna thlengte chungchangah hian, thuneitute'n an chungah hmâ an la lo a nih chuan, Zo Indigenous Forum chuan National Human Rights Commission (NHRC), National Commission for Scheduled Tribes, National Commission for Women (NCW) leh United Nations hnenah thlengin hma a la dawn a ni tih kan hriattir bawk e.
(J. ROCHUNGNUNGA)
Coordinator