Myanmar aṭanga ráltlânte enkawlnaah Thingsai khuain harsatna an tâwk ṭan

Aizawl, 12 July 2022:  Myanmar ram buai avanga sahimna zawnga Mizorama rawn lut zinga eng emaw zatin an pan Thingsai khuaah ráltlân chhungkua 57-a mi 356 an awm mek a, ei leh in lamah harsatna an tâwk ṭan.

A refugee camp in Thingsai village

Thingsai khawtlang hruaitute chuan Vanglaini zawhna chhángin, tun dinhmunah khawchhak tlangdunga ráltlân la awm tamna ber khua an nih an rin thu an sawi a, "Ráltlânte enkawl nana páwl, kohhran leh mimal anga ṭanpuina eng emaw zat kan dawn tawhte chu a kangchah ṭan avangin ráltlânte hnena ration sem turah harsatna kan tawk ṭan," an ti.

Ráltlân an tam vanglaiin mi 900 chuang Thingsai khuain an mikhual tih sawiin khawtlang hruaitute chuan, "Hun eng emaw chen kan zinga an awm hnuah a tam zawk chu an khuaa an in leh loah an kîr leh tawh a, chutihrualin, sipaiin an in leh lo an hâl chhiat vek avanga kìr lehna tur nei tawh lote chu tunah hian Thingsai khuain kan la enkawl mek," an ti a; kîr lehna tur nei tawh lote chu chhungkaw 57-a mi 356 an nih thu an sawi.

Thingsai khawtlang hruaitute chuan, ráltlânte ṭanpuina tur an dawn khawm aṭangin kum khat chuang chawlhkar thum danah ration an sem tawh tih an sawi a, "Ṭanpuina kan dawn nasat lai chuan sorkar pùr buai loin hma kan la a, ṭum khatah mi pakhat tan buhfai kg. 7 kan sem ṭhin a, vawi khat kan sem hian buhfai bag 30 vel kan sem ral ṭhin," an ti.

Khawtlang hruaitute chuan, a hranpaa châwm hlâwm tawp a theih loh avangin VC leh mimalin ráltlânte inhlawhna tur an siam fo thu sawiin, "VC anga inhlawhna kan siam pawhin khaw chhung mite chu thîk lo turin kan ngen ṭhin. An inhlawhna tam zawk chu mimal hlo thawlh, thing thiar leh lung lak te a nih bakah, chakai leh rawtuai khawrhtein sum an tuak ve ṭhin," an ti bawk.

Ration an sem hnu hnun ber chu chawlhkar thum liam ta vel kha a nih thu te, tun dinhmunah ration an sem ṭhin chu sem tur an neih tawh loh thu te, ration an sem inkara inhlawhna tur nei lo mangang tak takte tana an dah ṭhin buhfai ip pali leh Hnahthial DC kaltlanga an dawn ip pariat chiah an neih tawh thute an sawi a ni.

Ruihhlo leh dan phal loh thil zawrh leh lakluh chungchangah ráltlân zinga inhnamhnawih an awm leh awm loh zawhna chhangin Thingsai khawtlang hruaitute chuan, "Tun dinhmunah chutiang chu kan la tawng lo. Danin a phal lohte ti lo tura inhrilhfiah nan thla tin kan ko khawm ṭhin a, dan leh hrai hrang hrang zirtirna kan neihpui ṭhin," an ti a; YMA ruihhlo do pawl an in din thu an sawi bawk.

~ Vanglaini