Riverine Reserved Forest (RRF) a rìn luh duh loin kawng an zawh

Aizawl 18 July 2022: Riverine Reserved Forest (RRF) huam chhunga Tlabung khua rìn luh a nih duh lohna lantir nan leh an chenna hmun huamtir lo tura thuneitute kar nan Tlabung Joint Action Committee chuan July 16, Inrinni khan kawngzawh an huaihawt a, mi ṭhahnem takin kawng an zawh.

Tlabung JAC chairman P Vanlalmawia chuan, RRF huam chhunga Tlabung rìn luh a nihna sûttir tura thuneitute an dàwr tawhnain awmzia a neih thui loh avanga kawngzawh huaihawt ta an nih thu a sawi a; RRF chu thil ṭha a nih avangin an dodal ngawr ngawr loh rualin, kum 1965-a RRF a awm hma daih, kum 1871-ah Tlabung chu din a nihtawh a, mi an chen tawh avangin RRF huam chhunga Tlabung rìn luh chu pawm chi a nih loh thu a sawi bawk.

Tlabung aṭanga thu dawn danin, kawng zawhnaah hian mi 2,000 chuang an tel a, JAC chairman P Vanlalmawia bak­ah, vice chairman Lal­hming­thangi leh Tlabung branch YMA finance secretary C Lalrin­tluanga te pawhin thu an sawi.

Tlabung chu RRF pian hma daiha awm tawh a nih thu te, thlamuang taka an chenna RRF hmanga hung hnan a ni chu an hriatthiam loh thu te, an dikna leh chanvo humhalh tura a tàwp thlenga kal zel an tum thute hmangin mipui an au rual a ni.

~ Vanglaini