Header Ads

Recent Post
recent

Outcome Document of UN World Conference on Indigenous Peoples (Mizo)

Sixty-ninth sessions
Agenda item 65

Ni 22 September 2014 a General Assembly in thutlukna a siamte
[without reference to a Main Committee (A/69/L.1)]

   69/2 : Ram leilung diktak fate (Indigenous Peoples) chungchang rorelna sang khawvel pumhuap a inhmuhkhawmna General Assembly thuchhuakte.


            General Assembly
            chuan hengte hi a relchhuak:


Ram leilung diktak fate (Indigenous Peoples) chungchang rorelna sang khawvel pumhuap a inhmuhkhawmna General Assembly thuchhuakte

1.         Keini, sorkar hruaitu leh minister-te leh sorkar aiawhte hian United Nation thutlung (charter) hi ram leilung fate (indigenous peoples) hamthatna tur ani tih thinlung taka kan pawmpui tlat avangin General Assembly intawh khawmna pawimawh bik (high-level plenary meeting of the General Assembly) World Conference on Indigenous Peoples an tih bawk chu UNO Headquater New York, USA ah ni 22 leh ni 23 September 2014 hian kan nei a. He khawmpui tum ber chu UNO hmanga ram leilung fate  hamthatna leh dikna chungchang venhim tlat a ni.

2.         Ram leilung fate chungchang sawikhawm tura khawmpui lian inbuatsaihna - Global Indigenous Preparatory Conference kum 2013 a Norway ram Alta khua inhmuhkhawmna te kha thinglung takin tha kan ti. He khawmpui lian thuchhuak leh chumi atana ram leilung fate hnathawh pawh kan lo hre tawh a.  He General Assembly khawmpui pawimawh bik atana ram leilung fate hnathawh leh hemi atana an telna te pawh hi a pawimawh kan ti em em a ni.

3.         UNO General Assembly tahrik ni 13, September kum 2007 in ram leilung fate dikna leh chanvo thupuanchhuah (United Nations Declaration on the Rights of Indigenous Peoples) “ram leilung fate dikna chanvo humhalh” hrul zelah thawh tha kan ti a. Chutiangin ram rorelna kawngah pawh ram leilung fate nunkhua nghawng thil a awm a nih chuan an mahni hrilhhriat bakah an phalna lak hmasak zel hi he thupuanchhuah nen a inmil thlap tih kan pawm a ni.

4.         Ram leilung fate tana thupuanchhuah dungzuia inzah tawnna, inpuih tawhna leh hmasawn tlanna te hian ram leilung fate dikna leh chanvo hnualsual tur a ni lo tih kan tarlang nawn leh a, zah tlat  turin kan intiam a ni.

5.         UN Declaration bakah hian kum engemaw zat kalta atang khan ram leilung fate hamthatna leh an dikna humhalhna kawnga hmalakna tu tur hrang hrang heng - Permanent Forum on Indigenous Issues (UNPFII), Expert Mechanism on the Rights of Indigenous Peoples (EMRIP) leh ram leilung fate chungchang bik enkawltu tur mithiam ruat bim (Special Rapporteur on the rights of indigenous peoples) te din an lo ni tawh a, heng ho te nen inrawn tlana thawhho tlat hi kan duhdan a ni.

6.         Ram leilung fate dikna leh chanvo humhalhna atana International Labour Organization dan zam International Labour Organization Indigenous leh Tribal Peoples Convention, 1989 (No. 169) la zawmlo ram zawng zawngte pawh zawm ve ngei turin kan ngen a, zawm tawh ramte pawh he dan hi a taka hmang ngei turin kan chah bawk a ni.

7.         Keini khawvel ram hrang hrang rorelna fawng vuantute hian ram leilung fate nen inrawn chung zelin an dikna leh chanvo humhalh kawngah te, dan leh rorelna hmunah te, an tana thupuanchhuah (UNDRIP) tihhlawhtlin kawng mai bakah dan siamtu, dan lekkawhtu leh sorkar hnathawkte hrilhriat leh zirtir kawngah pui turin intiam a ni.

8.         Ram leilung fate leh an aiawh thlanchhuah te hmangin ram kalsiam kawng hrang hrangah UNO thupuanchhuah a hlawhtlin theih nan pawh puih kan intiam a ni.

9.         Ram leilung fate zinga pianphunga rualbanlo/harsatna nei te hi kan ngai pawimawh hle a, eizawnna leh khawtlang nun (social and economic) ruahmanna kawngah pawh anmahni nen a inrawn tlanga ruahmanna siam hi kan duhdan a ni a. Ram Dan siam kawngah pawh pianphung harsatna neite dinhmun chawikan leh dahpawimawh ngei kan intiam a ni.

10.       Ram leilung fate dinhmun hrechiang turin anmahni nena thawkho a zir chianna leh survey neih hi kan thlawp hle, a bikin heng ngaihtuah ngai bik tar leh upa te, hmeichhia, naupang leh pianphunga harsatna neite hi ngaipawimawh bik kan intiam a ni.

11.       Ram leilung fate nunphung danglam bik zah chungin heng eizawnna, hriselna, in leh lo neih kawng, tui in tur tha, faina leh hriselna kawnga hma an sawn zel theihna turin  zirna tha tak pek hi sorkar ruahmanna ah tel ngei kan intiam a ni.

12.       Ram leilung faten hriselna leh damna kawnga an in enkawlna thin te leh ramhmul damdawi (traditional knowledge) leh damdawi thiamna  an neih te hi hlu kan tiin kan pawmpui a ni.

13.       Ram leilung faten tisa leh thlarau lama hriselna tur sorkar ruahman, midang ang bawka an dawn ngei theih nan kan intiam a. Natna khirh tak tak HIV, AIDS, Sikserh, Ngawr hri leh natna inkaichhawn theih lakah an fihlim theih nan a vennna kawngah te, inthlahchhawna leh chhungkaw hriselna tha an neih theih nan ruahmanna kawngah te, sum leh paia tanpui a theihtawp chhuah kan intiam bawk, chumi  hlawhtlinna tur atan inkhawmpui lian pahnih Programme of Action of the International Conference on Population and Development leh Beijing Platform for Action thuchhuak anga kal zel kan duhdan a ni.

14.       Ram leilung fa zinga naupangte hian khawtlang dan leh dun, tawng, sakhua leh rindan a duhdan ang tak leh zalen taka an hman theih nan dikna an nei tih kan pawm a, vawnghim turin kan intiam bawk.

15.       Thalaite tih hmasawn leh dikna chawikan hi kan ngaipawimawh hle a, anmahni nghawng thei chungchang relkhawmna reng rengah an ngaihdan lak tel ngei hi tha kan ti.  Hriselna emaw zirna chungchang a ni emaw, tawng chungchang leh thalai nun hrim hrim nghawng thei tur ruahmanna kalpuina reng rengah ngaihpawimawh a, an tel ve ngei theih nan hmalak kan intiam bawk.

16.       Ram leilung faten anmahni duansa dan leh hrai hmanga an inenkawlna hi anmahni inkara inpawhna siamtu leh rorelna awlsam zawk a nih avangin hetiang awmna khawtlang reng reng tanpui zel tha kan ti.

17.       Hmeichia te dikna leh chanvo hi kan dah pawimawh hle a, anmahni pual bika pawl awm te pawh thuam chak zel hi kan duhdan a ni. Anmahni chungchang emaw anmahni nghawngtheitur inrelbawlna kawng reng rengah tel zel theih se tih hi kan duhdan a ni.

18.       Ram leilung fate lakah tharum thawhna leh ensanna a awm fo thin a, abikin hmeichhia, naupang,  tar, thalai leh piangsual chunga thleng thin venhimna dan felfai tak neihna turin thawh zel kan intiam a ni.

19.       Hmeichhiate chunga tharum thawhna awm fo thinna chhan hi Human Rights Council hian an chungchang enkawl tur biaka  ruat entirnan Special Rapporteur on the rights of indigenous peoples leh thildang enkawl tur bika ruat (Special Rapporteur – mandate holders) te nen inrawn tlangin chhui chiang ngei se kan ti a. Commission on the Status of Women hian an inhmuhkhawm leh hunah hemi chungchang hi telh ve ngei turin kan rawt a ni.

20.       Khawvel ram thenkhat ram leilung fate te hmakhawngai an awm tih kan hria, United Nations Declaration on the Rights of Indigenous Peoples zah chhunzawm zel tur leh ram hmasawnna tur anmahni nghawngthei ram, leilung leh a chhunga hausakna chungchanga ruahmanna (project) an siam dawn anih pawhin ram leilung fate thupuanchhuah mila an mahni rawn hmasa tur leh an phalna la hmasa ngei turin kan ngen a ni.

21.       UN Declaration zahtu khawvel ram hrang hrang te intiamna hi lawmawm kan ti a, ram leilung fate chungchangah dik tak leh fel taka hma an lak zel kan beisei.  Ram leilung fate ram chhung leilung leh a hausakna chungchangah pawh dik tak leh langtlang taka hma an lak zel kan beisei.

22.       Kan ram leilung chhe zel venhim nan leh khawvel kalzel atana ahim fo zawk avangin ram leilung faten pi leh pu atanga ram leilung an enkawl dan leh thiamna leh tih phung te hi kan zah sak tur a nia, an pawimawhna pawh kan hre tlat tur a ni.

23.       Sorkar in hmasawnna tura ruahmanna (project)  lian tak tak a siamfo a, chung zingah chuan leilung chhunga hausakna haichhuah chungchangah hian ram leilung leh a chhunga chengte tan a him ber lo fo thin a. Chumi venna atan chuan ram leilung fate nena thawhho kan inhuam reng a ni.

24.       Khawvel pum huapa sumdawng pawl lian ten khawvel dan dinglai Guiding Principles on Business and Human Rights: Implementing the United Nations “Protect, Respect and Remedy” hi zah tlat leh hemi hrula kal turin kan ngen a. Ram leilung fate dikna hnualsual anih loh nan hma lak zel kan tum a ni.

25.       Ram hmasawnna atana sorkar hmalakna program leh policies duan chhuah reng rengah ram leilung fate eizawnna leh a kaihhnawih te tibuai lo leh tichhelo tur hmalak kan duh bawk a ni.

26.       Ram leilung fate eizawnna leh khawtlang inawpna te, an chhehvel thing leh mau humhalh dan te bakah thlai chi venhim leh vawn that, ram leilung hman tangkai, hriselna, khawtlang nun, thiamna bil kawng hrang hrang heng tui lak leh dahkhawl thlengin ram hmasawnna kawng atana peng pawimawh tak a ni tih kan pawm a ni.

27.       UN Declaration-in a tarlan angin ram leilung fate sakhua leh serh leh sang te hi zahsak a, an duh anga an hman theih a pawimawh kan ti a. Serh leh sang hmanraw pawimawh hmun hrang hrang a awmte pawh zah tak chungin a awmna tur hmun taka lakkhawm leh an hman theih hi kan duh dan ni.

28.       Ram leilung fate chungchang enkawl tura ruat bik awm tawh sa te chungchang hi Human Rights Council chuan awmze nei zawka hman tangkai a nih theih nan ennawn leh turin kan ngen a, a bikin Expert Mechanism on the Rights of Indigenous Peoples chungchang chu General Assembly thutkhawm vawi sawmruk pakrua (69th Assembly) a en nawn a, UN Declaration tih hmasawn lehzual tura hma an lak theih nan leh sorkar hrang hrang te pawh chumi tih hlawhtlinna atan bawhzui leh kenkawh kawngah hmalakna tawiawm the lehzual turin kan ngen a ni.

29.       UNO hnuaia mihring dikna leh chanvo humhalhna atana hma la tu biak (treaty bodies) hrang hrang te chu an hmalaknaah UN Declaration hmang tangkai turin kan sawm a. Chutiang bawkin ram hrang hrang te pawh heng treaty bodies te hnena report an thawn hunah pawh  ram leilung fate chungchang, a bikin UN Declaration tih hlawhtlin na kawnga an hmalak dan tilang tel thin turin kan beisei a ni.

30.       Ram hrang hrang leh ram hlawm bialkhat (regional) chhunga mimal dikna chanvo humhalhna atana pawl din (human rights institutions) ten UN Declaration tih hlawhtlinna kawnga hma an lakna hi ka thlawp tlat a. Chutiang bawkin mimal, pawl leh zirna huang chhungah pawh ram leilung fate dikna leh chanvo humhim kawnga chak lehzuala hma la turin kan sawm bawk a ni.

31.       UNO Secretary-General chu ram leilung fate leh Inter-Agency Support Group on Indigenous Peoples’ Issues leh UNO member ram te nen tangtlanga General Assembly vawi sawmsarih (70) naah Economic and Social Council kaltlanga ram leilung fate tana thupuanchhuah chungchang report pe turin kan ngen a. Chutiang bawkin General Assembly vawi sawmsarih na zawh hnuah UNO chhunga senior official ruat a, ram leilung fate chungchnga mawhphurna nasa zawk nei a hma la tu tur siam turin kan ngen bawk a ni.

32.       United Nations leh a peng hrang hrang, bakah ram bung chhung enkawl tura ruat (resident coordinators) te chu an hmalakna hrang hrangah UN Declaration hlawtlin theihna atana ngai pawimawh tur leh United Nations Development Assistance Frameworks chhungah a tam thei anga hma la zel turin kan sawm a ni.

33.       UNO General Assembly vawi 70 naah hian ram leilung fate kawng enkimah an manhni nghawng theitur thil reng rengah chuan UNO hnuai peng hrang hrang rorelna leh inhmuhkhawmnaah an tel ve ngei theih nan ngaihtuah turin ka intiam a, chumi ti tur chuan ahnuaia number 40 na a kan sawi ang hian Secretary General pawh ruahmanna siam turin kan ngen bawk a ni.

34.       Ram leilung fate hi leilung leh chhunga cheng thildang te nen hmanlai atang tawhin inngeih tak leh inrem takin an lo khawsa ho tawh thin a, chu chuan eizawnna, khawtlang nun leh an chhehvel thildang enkawl na kawngah thiamna pe in hei hian thangthar zel te tan tluantling hmasawna(sustainable development) atan a pawimawh tih kan pawm a, ram hrang hrang te pawh hmang tangkai a pawmpui theuh turin kan beisei a ni.

35.       Ram leilung faten ten an awmna leilung leh an chhehvel hmangaih tak leh an mamawh mila an enkawl dan leh hman dan zawng zawng hi zah tlak niin kan hria.

36.       Ram leilung faten duat taka an awmna leilung leh an chhehvel an enkawl dan hi khawvel ram hrang hrang ten an ngaihhlut a tul kan ti a, khawvel lum chho zel (climate change) leh a venna atan pawh an thiamna hi ram hrang hrang te pawhin entawn a chhawr tangkai tlak a ni tih kan pawm a ni.

37.       Ram leilung fate hian hmasawna atana anmahni duhdan taka an inenkawl ve hi tha kan ti a ni. Chumi atan chuan kum 2015 hnulam ruahmanna (post 2015 post-2015 development agenda)-ah pawh an dikna leh chanvo dah tel ngei a tul kan ti hle a ni.

38.       Khawvel ram hrang hranga mimal leh pawl hrang hrang bakah, UNO hnuaia pawl United Nations Voluntary Fund for Indigenous Peoples, Trust Fund on Indigenous Issues, Indigenous Peoples Assistance Facility leh  United Nations Indigenous Peoples’ Partnership-te kaltlanga ram leilung fate dinhmun chawisang zel hi turin kan sawm a ni.

39.       UNO Secretary-Genral chu Millennium Development Goal Report a pek hunah ram leilung fate chungchang a bik takin tarlang ngei turin kan ngen bawk a ni.

40.       Ram leilung faten an ngaihmawh zawng an tarlan te chungchangah UNO General Assembly vawi 70-ah hian Inter-Agency Support Group on Indigenous Peoples’ Issues leh member ram te chuan Economic and Social Council kaltlangin rawtna leh UN System chhunga siamthat ngai te siam fel a United Nations Declaration on the Rights of Indigenous Peoples hlawhtlin theih nan hma la theuh turin kan sawm a, chutiang atan chuan ruahmanna siam tur pawhin Secretary-Genral hi kan ngen nghal bawk a ni.

4th plenary meeting
22 September 2014


Translated by : Zo Indigenous Forum
www.zoindigenous.blogspot.com
2015
Powered by Blogger.